మాజీ రాజ్యసభ సభ్యులు టీజీ వెంకటేష్ ప్రత్యేక పూజలు
1 min read
పల్లెవెలుగు వెబ్ కర్నూలు: శ్రీ వాసవి మాత ఆత్మార్పణ దినోత్సవ సందర్భంగా మాజీ రాజ్యసభ సభ్యులు టీజీ వెంకటేష్ సతి సమేతంగా పూల బజార్ నందున్న అమ్మవారి శాలలో, అలాగే కల్లూరు లో ఉన్న అమ్మవారి శాలలో ప్రత్యేక పూజలను నిర్వహించారు. ఈ సందర్భంగా టీజీ వెంకటేష్ దంపతులను పండితులు వేదమంత్రాలతో ఆశీర్వచనం పలికారు. అనంతరం టీజీ వెంకటేష్ మాట్లాడుతూ ఆర్యవైశ్యుల ఆడపడుచుల ఆత్మాభిమానం కోసం వాసవి మాత ఆత్మార్పణ చేసిన రోజు, ఈ రోజు అని తెలిపారు. ఆమెతో పాటు 102 మంది కూడా అగ్నికి ఆహుతై ఆత్మార్పణ చేశారని తెలిపారు. అందుకే ఆర్యవైశ్యులకు 102 గోత్రాలు ఏర్పడ్డాయని, ఆ గోత్ర నామాల ప్రకారమే సంప్రదాయ బద్దంగా వివాహాలు చేసుకోవడం జరుగుతుందని టీజీ తెలిపారు. ఆర్యవైశ్యులకు ఎంతో పవిత్రమైన అమ్మవారి ఆత్మార్పణ దినోత్సవాన్ని రాష్ట్ర ప్రభుత్వం అధికారిక కార్యక్రమంగా నిర్వహించ తలపెట్టడం అభినందనీయమన్నారు. అంతేకాకుండా పెనుగొండలో జరిగే ఈ వేడుకలకు స్వయంగా ముఖ్యమంత్రి చంద్రబాబు నాయుడు, మంత్రి టీజీ భరత్ హాజరు కావడం హర్షించదగ్గ విషయమని అన్నారు. అమ్మవారి ఆశీస్సులతో ఆర్యవైశ్యులు అందరూ నియమ నిబద్ధతతో వ్యాపారాలు నిర్వహించుకుంటూ సుఖ సంతోషాలతో ఉండాలని కోరుకుంటున్నట్టు టీజీ వెంకటేష్ తెలిపారు. ఈ కార్యక్రమంలో కూడా చైర్మన్ సోమిశెట్టి వెంకటేశ్వర్లు, వాయుగుండ్ల సుబ్బారావు, విఠల్ శెట్టి, సుబ్రహ్మణ్యం, శేషగిరి శెట్టి తదితరులు పాల్గొన్నారు.
About Author
