అర్హులైన ప్రతి ఒక్కరూ ఓటు నమోదు చేసుకోవాలి
1 min read
నగరపాలక కమిషనర్, ఆర్వో ఎస్.రవీంద్ర బాబు
పల్లెవెలుగు వెబ్ కర్నూలు: యువతతో పాటు అర్హులైన ప్రతి ఒక్కరూ తప్పనిసరిగా ఓటరుగా నమోదు చేసుకోవాలని నగరపాలక కమిషనర్, కర్నూలు నియోజకవర్గ ఎన్నికల రిటర్నింగ్ అధికారి ఎస్.రవీంద్ర బాబు అన్నారు. స్పెషల్ సమ్మరీ రివిజన్-2025 కార్యక్రమంలో భాగంగా శనివారం అన్ని పోలింగ్ కేంద్రాల వద్ద ఓటు నమోదు, సవరణలు, తొలగింపునకు సంబంధించి ప్రత్యేక శిబిరాలు ఏర్పాటు చేశారు. దామోదరం సంజీవయ్య స్కూల్, టౌన్ మోడల్ స్కూల్, మాంటిస్సోరి స్కూల్, చెట్టుకింద బడి, వడ్డేగిరి, ఏ.క్యాంపు తదితర ప్రాంతాల్లో పోలింగ్ కేంద్రాలను కమిషనర్ పరిశీలించారు. ఈ సందర్భంగా ఆయన మాట్లాడుతూ ప్రజాస్వామ్య దేశంలో ఓటు హక్కు ఎంతో కీలకమైందని, ప్రతీ ఒక్కరు ఓటుహక్కును వినియోగించుకొని మంచి ప్రజా నాయకులను ఎన్నుకొని దేశాభివృద్ధికి పాటుపడాలని పేర్కొన్నారు. ఆదివారం సాయంత్రం 5 గంటల వరకు పోలింగ్ కేంద్రాల వద్ద ప్రత్యేక ఓటరు నమోదు శిబిరాలు ఉంటాయని, ప్రజలందరూ వినియోగించుకోవాలని కమిషనర్ కోరారు.
About Author
