ఆంధ్రప్రదేశ్‌లో ఆహార ప్రాసెసింగ్ పరిశ్రమలకు వన్-స్టాప్ హెల్ప్‌లైన్

ఫుడ్ ప్రాసెసింగ్ రంగాన్ని మరింత బలోపేతం చేస్తున్నాం.. రాష్ట్ర మంత్రి టీ.జీ భరత్

హెల్ప్ లైన్ నంబర్ లాంచ్ చేసిన మంత్రి టీ.జీ భరత్

పల్లెవెలుగు వెబ్ కర్నూలు: రాష్ట్రంలో ఫుడ్ ప్రాసెసింగ్ రంగాన్ని మరింత బలోపేతం చేసేందుకు కృషి చేస్తున్నామని రాష్ట్ర పరిశ్రమలు, వాణిజ్యం, ఫుడ్ ప్రాసెసింగ్ శాఖ మంత్రి టీ.జీ భరత్ తెలిపారు. మంగళగిరిలోని ఏపీఐఐసీ కార్యాలయంలో ఆహార పరిశ్రమల ప్రోత్సాహక సౌలభ్య వన్-స్టాప్ హెల్ప్‌లైన్ – 04045901100 ను మంత్రి టీజీ భరత్ లాంచ్ చేశారు. ఈ సందర్భంగా మంత్రి టీజీ భరత్ మాట్లాడుతూ ప్రభుత్వ విధానాలలో పారదర్శకతను పెంచడం, ఆహార ప్రాసెసింగ్ రంగంలోని పారిశ్రామికవేత్తలను ప్రోత్సహించడం, వారి సమస్యలకు పరిష్కార మార్గాలను చూపడం ఈ కార్యక్రమ ప్రధాన లక్ష్యం అన్నారు.ఈ హెల్ప్‌లైన్ ఫుడ్ ప్రాసెసింగ్ పాలసీ 4.0 (FPP4.0) కు సంబంధించిన కీలకమైన సమాచారం, స్పష్టతలను అందించడం ద్వారా పెట్టుబడిదారులు మరియు పరిశ్రమలు సులభంగా తమ వ్యాపార కార్యకలాపాలను కొనసాగించేందుకు సహాయపడుతుందన్నారు. అంతేకాకుండా, ప్రాజెక్ట్ రిపోర్ట్ సమర్పణ నుండి అన్ని అవసరమైన దశల్లో ప్రభుత్వ అనుమతులు పొందే వరకు నూతన పరిశ్రమలకు సహాయ సహకారం అందించడంలో ఈ హెల్ప్‌లైన్ కీలక పాత్ర పోషిస్తుందని చెప్పారు.

దీని ద్వారా కొత్త పెట్టుబడులకు త్వరితగతిన అనుమతులు లభించేలా చూడబడుతుందన్నారు.

మైక్రో-ఎంటర్‌ప్రెన్యూర్స్‌ తమ పరిసరాల్లో ఆహార ప్రాసెసింగ్ వ్యాపార అవకాశాలను గుర్తించేందుకు ఈ హెల్ప్‌లైన్ మార్గనిర్దేశం చేస్తుందని, ప్రధాన మంత్రి ఫార్మలైజేషన్ ఆఫ్ మైక్రో ఫుడ్ ప్రాసెసింగ్ ఎంటర్ప్రైజెస్ పథకం (PMFME) కింద జిల్లా రిసోర్స్ పర్సన్ (డి.ఆర్.పి) లను మైక్రో-ఎంటర్‌ప్రెన్యూర్స్‌ను అనుసంధానం చేస్తుందన్నారు. తద్వారా వారు తమ స్వంత ఆహార ప్రాసెసింగ్ యూనిట్లు ఏర్పాటు చేసుకోవడానికి సహాయపడుతుందని తెలిపారు.పారిశ్రామిక రంగంలో సులభతరం చేయబడిన వ్యాపార కార్యకలాపాలను మరింత మెరుగుపరచేందుకు, ఈ హెల్ప్‌లైన్ ప్రభుత్వ అనుమతులు, ఆమోదాలు, ఇతర పరిపాలనా సమస్యలకు సంబంధించి వచ్చిన ఫిర్యాదులను పరిష్కరించేందుకు క్రియాశీలంగా పని చేస్తుందన్నారు. అలాగే, PMFME లోన్స్ కు సంబంధించి బ్యాంకుల సమస్యలను పరిష్కరించేందుకు మధ్యవర్తిగా వ్యవహరించి, తక్షణ రుణ ఆమోదాలు అందించేందుకు సహాయపడుతుందన్నారు. ఈ కార్యక్రమం ఆంధ్రప్రదేశ్ ప్రభుత్వం ఆహార ప్రాసెసింగ్ పరిశ్రమ అభివృద్ధికి అంకితభావంతో పని చేస్తుందనే విషయాన్ని స్పష్టంగా ప్రతిబింబిస్తుందని మంత్రి టీజీ భరత్ చెప్పారు.మరిన్ని వివరాల కోసం పెట్టుబడిదారులు, పారిశ్రామికవేత్తలు 04045901100 నంబర్‌కు సంప్రదించి తక్షణ సహాయం, మార్గదర్శనం పొందవచ్చుని కోరారు.

About Author

PvNews1

See author's posts