ప్రాజెక్టులు, విద్యుత్కేంద్రాలు అప్పగించండి! ఉభయరాష్ట్రాలకు కేఆర్ఎంబీ సూచన
1 min read
పల్లెవెలుగువెబ్, హైదరాబాద్: ఉభయ తెలుగురాష్ట్రాల్లోని శ్రీశైలం, నాగార్జునసాగర్ ప్రాజెక్టులు, వాటి పరిధుల్లోని విద్యుత్కేంద్రాలను తమకు అప్పగించాలని కృష్ణా రివర్ మెనేజ్మెంట్ బోర్డు ఆంధ్రా, తెలంగాణ ప్రభుత్వాలకు సూచించింది. మంగళవారం హైదరాబాద్లోని విద్యుత్ సౌదాలో కేఆర్ఎంసీ బోర్డు సమావేశం జరిగింది. ఈమేరకు శ్రీశైలం, నాగార్జునసాగర్ ప్రాజెక్టుల పరిధుల్లోని అన్ని అవుట్లెట్లను బోర్డు పరిధిలోకి తీసుకోనున్నట్లు కేఆర్ఎంబీ చైర్మన్ ఎంపీసింగ్ వెల్లడించారు. ఉభయ తెలుగురాష్ట్రాలు ప్రాజెక్టులు, విద్యుత్కేంద్రాలు బోర్డులకు అప్పగిస్తే ఈనెల 14నుంచి గెజిట్ అమలు చేస్తామన్నారు. ఇటీవల కేంద్ర జలశక్తి మంత్రుత్వశాఖ ప్రాజెక్టులను ఆయా రివర్ బోర్డుల పరిధుల్లోకి తెచ్చేందుకు గెజిట్ నోటఫికేషన్ విడుదల చేసిన విషయం తెలిసిందే. ఈ నేపథ్యంలో ఉభయ తెలుగురాష్ట్రాల ప్రాజెక్టులు, విద్యుత్కేంద్రాల అప్పగింతను కోరుతున్నట్లు కేఆర్ఎంబీ చైర్మన్ పేర్కొన్నారు. అప్పగింతకు ఏపీ ప్రభుత్వం ముందుకురాగా తెలంగాణ మాత్రం ససేమిరా అంటుండడం గమనార్హం. ఓవైపు ఇప్పటికే తెలంగాణ చేపడుతోన్న కృష్ణా జలాల నీటివినియోగం, విద్యుత్పత్తిని నిలిపివేయాలని ఏపీ ప్రభుత్వం కేఆర్ఎంబీకి పలుమార్లు లేఖలు రాసిన విషయం తెలిసిందే. అయినా తెలంగాణ ప్రభుత్వ వైఖరిలో మార్పులు రాకపోవడంతో ఏపీ ఫిర్యాదులు సైతం చేసింది.
About Author
