సుంకేశ్వరి లో చిన్నారి జ్యోతి మృతి బాధాకరం
1 min read
మృతి చెందిన జ్యోతి కుటుంబానికి రూ 5 వేలు సాయం
ఆర్వో ప్లాంట్ ఏర్పాటు చేయిస్తాం
వేడి చేసి నీటి ని తాగాలి
సుంకేశ్వరి లో పర్యటించిన ఎమ్మెల్యే వై. బాలనాగిరెడ్డి
పల్లెవెలుగు వెబ్ మంత్రాలయం: మండల పరిధిలోని సుంకేశ్వరి గ్రామంలో ఇటీవల వాంతులు విరేచనాలతో జ్యోతి మృతి చెందడం చాలా బాధాకరం అని మరల ఇలాంటి సంఘటనలు పునరావృతం కాకుండా అధికారులు చర్యలు తీసుకోవాలని మంత్రాలయం ఎమ్మెల్యే బాలనాగిరెడ్డి ఆవేదన వ్యక్తం చేశారు. గురువారం మండల పరిధిలోని సుంకేశ్వరి గ్రామంలో ఎమ్మెల్యే వై. బాలనాగిరెడ్డి వైకాపా మండల అధ్యక్షులు జి. భీమారెడ్డి తో కలిసి సందర్శించారు. గ్రామంలో గత కొద్ది రోజుల క్రితం వాంతులు విరేచనాలతో జ్యోతి అనే 4 సంవత్సరాల బాలిక మృతి చెందగా మరి కొంత మంది ఆదోని, ఎమ్మిగనూరు, కర్నూలు ప్రభుత్వాసుపత్రికి వెళ్లి వైద్యం పొందుతున్నారు. మరో ఇద్దరు చిన్నారులకు అతిసార వ్యాధి తో బాధపడుతున్న నేపథ్యంలో వారికి మెరుగైన వైద్యం కోసం కర్నూలు జిల్లా ఆస్పత్రికి తరలించారు. గత రెండు రోజుల కిందటే గ్రామంలో పర్యటించాల్సి ఉండగా అనివార్య కారణాల పర్యటించ లేకపోయానని తెలిపారు. జ్యోతి మృతి చెందడం చాలా బాధకరమని ఆవేదన వ్యక్తం చేశారు. తక్షణ సహాయం కింద రూ 5 వేల నగదును సర్పంచ్ ముక్కరన్న, మాజీ ఎంపిటిసి సభ్యులు రఘునాథ్ రెడ్డి చేతుల మీదుగా జ్యోతి కుటుంబ సభ్యులకు అందించారు. అంతకు ముందు గ్రామంలో సచివాలయంలో వైద్య ఆరోగ్య జిల్లా స్థాయి అధికారులు మండల స్థాయి అధికారులతో అతిసార వ్యాధి నివారణకు తీసుకున్న చర్యలను గురించి అడిగి తెలుసుకున్నారు. విషయం తెలిసిన వెంటనే గత వారం రోజుల క్రితమే సంబంధిత ఉన్నతాధికారులతో మాట్లాడటం కూడా జరిగిందన్నారు. అనంతరం పలు నివేదికలను పరిశీలించారు. గ్రామ శివారులో ఉన్న తాగునీటి బోరును పరిశీలించి గ్రామంలోని పాఠశాల ను సందర్శించారు. పాఠశాల లో విద్యార్థులకు ఎవైనా లక్షణాలు కన్పిస్తే వెంటనే వైద్యాధికారులకు తెలపాలని పాఠశాల ఉపాధ్యాయులను ఆదేశించారు. అనంతరం ఏర్పాటు చేసిన విలేకరుల సమావేశంలో ఎమ్మెల్యే మాట్లాడుతూ ప్రతి ఒక్కరూ శుభ్రత పాటించాలని వర్షాకాలం కావడంతో సీజనల్ వ్యాధులు ప్రబలే అవకాశం ఉంది కాబట్టి ప్రజలు కూడా తాగునీటి ని వేడి చేసుకుని తాగాలని కోరారు. అతిసార వ్యాప్తి చెందకుండా జిల్లా ఇన్ కలెక్టర్ నారపురెడ్డి మౌర్య, ఆదోని సబ్ కలెక్టర్ శివ నారయణ శర్మ, తహసీల్దార్, ఎంపీడీవో, ఆర్డబ్ల్యూఎస్, వైద్యాధికారులు, సర్పంచ్, ఎంపీటీసీ సకాలంలో స్పందించి ప్రజలకు అవసరమైన సేవలు అందించడం అభినందనీయమన్నారు. ప్రజలు కూడా ఎవైనా లక్షణాలు కన్పిస్తే వెంటనే వైద్యులను సంప్రదించి వైద్య సేవలు పొందాలని కోరారు. సుంకేశ్వరి తో పాటు నియోజకవర్గంలోని కొన్ని గ్రామాల్లో ఆర్వో ప్లాంట్లు ఏర్పాటు చేయాలని జిల్లా కలెక్టర్ దృష్టికి తీసుకుని వెళ్లడం జరిగిందని మండల స్థాయి అధికారులు నివేదికలు పంపితే మరోసారి కలెక్టర్ తో చర్చించి ఆర్వో ప్లాంట్ లు ఏర్పాటు చేయిస్తానని ఎమ్మెల్యే వై. బాలనాగిరెడ్డి హామీ ఇచ్చారు. ఈ కార్యక్రమంలో తహసీల్దార్ శ్రీధర్ మూర్తి, ఎంపిడిఓ మునేప్ప, ఆర్ డబ్య్లూ ఎస్ ఏఈ వేదస్వరూపా, వీఆర్వో ఆనంద్, పంచాయతీ కార్యదర్శి చిరంజీవి వైకాపా నాయకులు రోగప్ప, లక్ష్మయ్య, అయ్యప్ప, డీలర్ అంజి, శ్రీనివాసులు తదితరులు ఉన్నారు.
About Author
