ఆధార్‌ క్యాంపులను సద్వినియోగం చేసుకోవాలి
1 min read
– గ్రామ, వార్డు సచివాలయ జిల్లా అధికారి మనోహర్ రాజు
పల్లెవెలుగు వెబ్ అన్నమయ్య జిల్లా రాయచోటి: ఇంటర్మీడియెట్‌ విద్యార్థులు ఆధార్‌ కార్డుల్లో బయోమెట్రిక్‌ వివరాలను అప్డేట్ చేసుకునేందుకు ప్రభుత్వం అవకాశం కల్పించిందని గ్రామ, వార్డు సచివాలయ జిల్లా అధికారి మనోహర్ రాజు మంగళవారం ఒక ప్రకటనలో తెలిపారు. ఈ సందర్భంగా వారు మాట్లాడుతూ….మంగళవారం నుంచి 4 రోజులపాటు (ఫిబ్రవరి 7 నుంచి 10 వరకు) జిల్లా వ్యాప్తంగా 132 జూనియర్‌ కాలేజీలలో ప్రత్యేక ఆధార్‌ క్యాంపులు నిర్వహిస్తున్నామన్నారు. కనీసం పదేళ్ల వ్యవధిలో ఒక్కసారైనా ఆధార్‌ కార్డులో బయోమెట్రిక్‌ వివరాలను అప్డేట్ చేసుకోవాలని యూఐడీఏఐ నిబంధన తీసుకొచ్చిన విషయం తెలిసిందే అన్నారు. జిల్లాలో పదేళ్ల వ్యవధిలో ఒక్కసారి కూడా తమ ఆధార్‌ కార్డులో బయోమెట్రిక్‌ వివరాలను అప్డేట్ చేసుకోనివారు దాదాపు 24,667 మంది ఉన్నారని తెలిపారు. ఈ నేపథ్యంలో ప్రభుత్వం గ్రామ, వార్డు సచివాలయాల ఆధ్వర్యంలో ప్రతినెలా ప్రత్యేక ఆధార్‌ క్యాంపులు నిర్వహిస్తున్న సంగతి తెలిసిందే అన్నారు. 7 సంవత్సరాల నుంచి 17 సంవత్సరాల వయస్సు వారికి ప్రభుత్వం పూర్తి ఉచితంగా బయోమెట్రిక్‌ వివరాలను అప్డేట్ చేసుకోవడానికి అవకాశం కల్పిస్తోంది అన్నారు. ఇప్పటివరకు గ్రామ, వార్డు సచివాలయాల శాఖ 15 ఏళ్లలోపు వయసు కలిగిన విద్యార్థుల కోసం పాఠశాలల్లో ప్రత్యేక ఆధార్‌ క్యాంపులు నిర్వహిస్తూ వచ్చింది అన్నారు. సచివాలయాల్లో నిర్వహించే ప్రత్యేక ఆధార్‌ క్యాంపుల్లో ఆధార్‌ కార్డులో బయోమెట్రిక్‌ అప్డేట్ సేవలను ఉచితంగా అందజేయడంతో పాటు నిర్ణీత రుసుంతో అదనంగా మరో 10 రకాల ఆధార్‌ సేవలను పొందే అవకాశం ఉందని అధికారులు వెల్లడించారు. బయోమెట్రిక్‌ (ఫొటో, ఐరిస్, ఫింగర్‌ ప్రింట్‌) అప్డేట్, పేరు మార్పు, పుట్టిన తేదీ వివరాల మార్పు, జెండర్, చిరునామా మార్పు సేవలతో పాటు కొత్తగా ఆధార్‌ వివరాల నమోదు, ఆధార్‌ కార్డు డౌన్‌లోడ్‌ సేవలను కూడా ఆ క్యాంపుల్లో పొందవచ్చు అన్నారు. విద్యార్థులు ప్రత్యేక ఆధార్‌ క్యాంపులను సద్వినియోగం చేసుకోవాలని వారు విజ్ఞప్తి చేశారు.
About Author
