పూర్వ విద్యార్థుల.. ఆత్మీయ కలయిక..!
1 min read
–33 ఏళ్ల తరువాత కలిసిన స్నేహబంధం..
పల్లెవెలుగు వెబ్, నందికొట్కూరు:ప్రతి ఒక్కరి జీవితంలో గుర్తుండే తీపి జ్ఞాపకాలు చిన్నతనంలోనే ఉంటాయి. తను చదువుకునే రోజులు… చేసే అల్లరి… స్నేహితుల కోసం చేసే ఫైటింగ్లు… వారితో కలిసి ఆడిన ఆటలు… చిన్న చిన్న గ్యాంగ్లు… అవన్నీ ఓ మధురమైన క్షణాలు. మళ్లీ అవన్నీ గుర్తు చేసుకుంటూ ముప్పై మూడు ఏళ్ల తర్వాత కలుసుకుని ఆనందంగా గడిపారు..కర్నూలు జిల్లా నందికొట్కూరు మండలం బ్రాహ్మణ కొట్కూరులోని జడ్పీ ఉన్నత పాఠశాల పూర్వ విద్యార్థులు.
బ్రాహ్మణ కొట్కూరు జడ్పీ ఉన్నత పాఠశాలలో ముప్పైమూడు ఏళ్ల తీపి జ్ఞాపకాలను స్థానిక జడ్పీ ఉన్నత పాఠశాలలో పూర్వ విద్యార్థుల ఆత్మీయ కలయిక ఘనంగా నిర్వహించారు. 1988-89 విద్యా సంవత్సరం నాటి పూర్వపు విద్యార్థులు ముప్పై మూడు ఏళ్ల తర్వాత వారు చదువుకున్న పాఠశాలలో కలుసుకుని ఆనందంగా గడిపారు.
వాట్సప్ వేదికగా గత మూడు నెలల నుంచి మిత్రులందరూ ఒకరినొకరు పరిచయం చేసుకుని ఈ కార్యక్రమం నిర్వహించుకున్నారు. అప్పట్లో వారికి విద్యా బోధన చేసిన ఉపాధ్యాయులను సాదరంగా ఆహ్వానించారు. చదువు అనంతరం వివిధ ప్రాంతాల్లో స్థిరపడిన వారు ఒకరోజు ముందుగానే గ్రామాలకు చేరుకున్నారు. ఎన్నో ఏళ్ల తర్వాత ఒకరినొకరు కలుసుకుని మధుర జ్ఞాపకాలను తలుచుకుంటూ సంతోషంగా గడిపారు. వారు చదువుకున్న రోజుల్లో కొన్ని మధుర జ్ఞాపకాలు గుర్తుచేసుకుంటూ సందడి చేశారు. చదువు చెప్పిన గురువులను ఘనంగా సత్కరించి ఆశీర్వాదాలు తీసుకున్నారు. పూర్వ విద్యార్థులు మాట్లాడుతూ తమ లాంటి ఎంతో మంది విద్యార్థులకు విద్యాబుద్ధులు నేర్పించి, తీర్చిదిద్దిన గురువులను సన్మానించుకోవడం సంతోషంగా ఉందన్నారు. ఆర్థికంగా ఇబ్బంది పడుతున్న పలువురు స్నేహితులకు ఆర్థిక సహాయాన్ని అందించారు. అనంతరం మృతి చెందిన గురువులు, స్నేహితులకు నివాళులు అర్పిస్తూ మౌనం పాటించారు. పూర్వపు ఉపాధ్యాయులు ఓబుల్ రెడ్డి,తిమ్మారెడ్డి, రామకృష్ణ రెడ్డి, రాఘవా ఆచారి,ఈశ్వర రెడ్డి, నారాయణ స్వామి,బాల మద్దయ్య, పూర్వపు విద్యార్థులు పుట్ట రామకృష్ణ ,నాగేశ్వర రావు, సలీమ్, సుధాకర్ ,వెంకటేశ్వర రెడ్డి , వెంకటస్వామి, మత్తయ్య, పుల్లన్న, జయన్న, సునీత, రంగమ్మ, రామాంజనేయులు, తదితరులు పాల్గొన్నారు.
About Author
