ఏపీజేఏసీ అమరావతి కర్నూలు జిల్లా అధ్యక్షుడు గిరికుమార్ రెడ్డి
పల్లెవెలుగు వెబ్:రాష్ట్రంలో ఉద్యోగుల పరిస్థితి దయనీయంగా మారిందని, బ్యాంకులో అవసర నిమిత్తం తీసుకున్న రుణాలకు సకాలంలో ఈఎంఐ చెల్లించలేని దుస్థితిలో ఉన్నారన్నారు ఏపీజేఏసీ అమరావతి కర్నూలు జిల్లా అధ్యక్షుడు గిరికుమార్ రెడ్డి. ప్రభుత్వ మొండి వైఖరి కారణంగా ఉద్యోగులు వీధినపడే దుస్థితి నెలకొందని ఆవేదన వ్యక్తం చేశారు. మలిదశ ఉద్యోమంలో భాగంగా ఉద్యోగులు.. గురువారం కర్నూలు కలెక్టరేట్లోని ఎస్బీఐ వద్ద నిరసన తెలిపారు. ఈ సందర్భంగా గిరికుమార్ రెడ్డి మాట్లాడుతూ ప్రతినెల ఒకటో తేదీన జీతం రాకపోవడంతో బ్యాంకుల్లో రుణాలు తీసుకున్న ఉద్యోగులను డిఫాల్ట్ లిస్టులో పెడుతున్నారని, దీంతో భవిష్యత్లో సదరు ఉద్యోగికి రుణం తీసుకునే అవకాశం ఉండదన్నారు. ప్రభుత్వ ఉద్యోగులకు నెలలో జీతం ఏ రోజు వస్తుందో తెలియని గందరగోళ పరిస్థితుల్లో ఉన్నామన్నారు. బ్యాంకు మేనేజర్లు దయవుంచి…. ప్రభుత్వ ఉద్యోగులు తీసుకున్న రుణాలకు సంబంధించి ఈఎంఐలను జీతం పడినప్పుడే కట్ చేసుకోవాలని ఈ సందర్భంగా ఏపీజేఏసీ అమరావతి కర్నూలు జిల్లా అధ్యక్షుడు గిరికుమార్ రెడ్డి కోరారు. అనంతరం బ్యాంకు మేనేజర్లకు వినతిపత్రం అందించారు. కార్యక్రమంలో ఉద్యోగ సంఘాల నాయకులు ఉన్నారు.
