నేస్తం ఫౌండేషన్ కువైట్ ఆధ్వర్యంలో అన్నదానం
1 min read
పల్లెవెలుగు వెబ్, రాయచోటి: రాయచోటి నియోజకవర్గంలోని బండపల్లి ప్రేమాలయం ఆశ్రమంలో సోమవారం నేస్తం ఫౌండేషన్ కువైట్ ఆధ్వర్యంలో అన్నదాన కార్యక్రమం నిర్వహించారు. ఈ కార్యక్రమానికి ముఖ్య అతిథులుగా లయన్స్ క్లబ్ ఆఫ్ రాయచోటి టౌన్ అధ్యక్షులు లయన్ చాన్ బాషా హాజరయ్యారు. ఈసందర్భంగా ఆయన మాట్లాడుతూ స్వచ్ఛంద సంస్థలు సేవా కార్యక్రమాలు చేపట్టడం అభినందనీయమన్నారు. నేస్తం ఫౌండేషన్ ఆధ్వర్యంలో మొదటి సారిగా ప్రేమాలయం లో వృద్ధులకు అన్నదానం చేయడం శుభ పరిణామం అన్నారు. అదేవిధంగా నేస్తం ఫౌండేషన్ కుటుంబ సభ్యులు గంగా గారి తల్లి అయిన సుబ్బమ్మ గారి మీద ఉన్న ప్రేమకు గుర్తుగా అన్నదానం చెయ్యడం గొప్ప పుణ్య కార్యమని తెలిపారు. మిత్రులు నేస్తం ఫౌండేషన్ సంస్థ వ్యవస్థాపక అధ్యక్షుడు బెజవాడ నాగేష్ గారు కుల మత రాజకీయాలకు అతీతంగా గల్ఫ్ లో ఉన్నటువంటి కార్మికులు ఒక గ్రూపుగా ఏర్పడి తమ వంతుగా నిరుపేదలకు, అనాధలకు సేవ చేయాలన్న గొప్ప సంకల్పంతో నేస్తం ఫౌండేషన్ అనే సేవ సంస్థ ను ప్రారంభించడం అభినందనీయమన్నారు. ఇలాంటి వారిని చూసి మరి కొంతమంది వ్యక్తులు స్వచ్ఛందంగా ప్రజలకు సేవ చేయడానికి ముందుకు వస్తారని ఆశాభావం వ్యక్తం చేశారు. అనంతరం ఆశ్రమము మేనేజర్ కృష్ణ గారు మాట్లాడుతూ ఇక్కడున్న వృద్ధులకు అన్నదానం చేసిన నేస్తం ఫౌండేషన్ వారికి మరియు ఈ కార్యక్రమానికి సహకరించిన లయన్స్ క్లబ్ ఆఫ్ రాయచోటి టౌన్ వారికీ మా ప్రేమలయం ఆశ్రమము తరపున ధన్యవాదాలు తెలిపారు. ఈ కార్యక్రమంలో నేస్తం ఫౌండేషన్ సభ్యులు AV రమణ, మన తెలుగు సేవా సమితి గ్రూప్ అధ్యక్షులు శ్రీనివాసులు నాయుడు తదితరులు పాల్గొన్నారు.
About Author
