దేవుడి ప్రతిరూపం…బాలసాయి:టి.రామారావు
1 min read
భగవాన్ శ్రీ బాలసాయి సెంట్రల్ ట్రస్ట్ చైర్మన్ టి.రామారావు
కర్నూలులో తాగునీటి సమస్య పరిష్కారానికి రూ.10 కోట్లు ప్రకటన
పల్లెవెలుగు వెబ్, కర్నూలు: భగవాన్ శ్రీ బాలసాయిబాబా దేవుడి ప్రతిరూపం అని… పేదలకు సేవ చేసేందుకు దేవుడి రూపంలో జన్మించారని పేర్కొన్నారు భగవాన్ శ్రీ బాలసాయి సెంట్రల్ ట్రస్ట్ చైర్మన్ టి.రామారావు. బాలసాయిబాబా 62వ జన్మదినోత్సవం, ప్రపంచ శాంతి సదస్సును శనివారం కర్నూలులోని షిరిడిసాయిబాబా దేవాలయం పక్కనున్న బాలసాయిబాబా మందిరంలో వేడుకలు అత్యంత వైభవంగా నిర్వహించారు. ఈ సందర్భంగా బాలసాయి ట్రస్ట్ నేతృత్వంలో చేసిన… చేస్తున్న సేవా కార్యక్రమాలను బాబా భక్తులకు వివరించారు.
సేవే..లక్ష్యం..
బాలసాయి సెంట్రల్ ట్రస్ట్ నేతృత్వంలో పేద పిల్లలకు ఉచిత విద్య అందిస్తున్నామన్న చైర్మన్ రామారావు.. పేదల కోసం ఎన్నో కార్యక్రమాలు చేపడుతున్నట్లు వెల్లడించారు. పేద రజకులకు ఇస్త్రీ పెట్టెలు, మహిళలకు కుట్టుమిషన్లు, చిరువ్యాపారులకు తోపుడుబండ్లు, పండ్లు తదితరవి ఉచితంగా అందజేశారు. కర్నూలు ప్రజల దాహార్తి తీర్చేందుకు మేయర్ బీవై రామయ్య సాయం చేయాలని కోరగా… వెంటనే రూ.10 కోట్లు ట్రస్ట్ ద్వారా అందజేస్తామని ట్రస్ట్ చైర్మన్ రామారావు ప్రకటించారు. బాలసాయిబాబా దివ్య ఆశీస్సులతో మరిన్ని సేవా కార్యక్రమాలు చేపడతామని, ఇందుకు ప్రజాప్రతినిధులు, అధికారులు, ప్రజలు సహకరించాలని కోరారు.
ఓమ్నీ, అమ్మ, ఆర్క్ హాస్పిటల్స్ సేవలు… అద్బుతం..
బాలసాయిబాబా 62వ జన్మదినం సందర్భంగా ఓమ్నీ, అమ్మ, ఆర్క్ హాస్పిటల్స్ ఆధ్వర్యంలో ఉచిత వైద్యపరీక్షలు, మందులు పంపిణీ చేయడం అభినందనీయమన్నారు. బాలసాయిబాబా ట్రస్ట్ నేతృత్వంలో చేసే సేవా కార్యక్రమాల్లో ఆయా ఆస్పత్రులు పాల్గొనడం ప్రశంసనీయమన్నారు. ఈ సందర్భంగా దాదాపు 500 మందికి వైద్యపరీక్షలు నిర్వహించారు. కార్యక్రమంలో నగర మేయర్ బీవై రామయ్య, మాజీ ఎమ్మెల్యే ఎస్వీ మోహన్ రెడ్డి సతీమణి శ్రీమతి విజయ మనోహరి, భగవాన్ శ్రీ బాలసాయిబాబా సెంట్రల్ ట్రస్ట్ చైర్మన్ టి. రామారావు, రాష్ట్ర వీరశైవ లింగాయత్ కార్పొరేషన్ డైరెక్టర్ ఎన్.గోపాల్ రెడ్డి, మాజీ ఎమ్మెల్యే మదనగోపాల్, విశ్వహిందూ పరిషత్ సౌత్ ఆంధ్రప్రదేశ్ అధ్యక్షుడు ఎన్.సాయిరెడ్డి , జిల్లా అధ్యక్షుడు గోరంట్ల రమణ, కె.వి. సుబ్బారెడ్డి విద్యా సంస్థల అధినేత కె.వి. సుబ్బారెడ్డి, ట్రస్ట్ ప్రతినిధులు కె.ఉషాశ్రీ, డా.సుబ్రమణ్యశ్వర రెడ్డి, శ్రీ బాలసాయి హాస్పిటల్ డాక్టర్ జయప్రకాష్, విదేశాల నుంచి వచ్చిన బాలసాయి శిష్యులు ఎలియానా ఫీ, లిల్లీ జెన్సన్, డా. హినజ్ లిస్బోక్ పాల్గొన్నారు.
About Author
