పల్లెవెలుగు వెబ్: ఉత్కంఠ‌కు తెర‌ప‌డింది. కృష్ణా జిల్లా కొండపల్లి మున్సిపల్ చైర్మన్ ఎన్నిక పూర్తయ్యింది. విశ్వ‌స‌నీయ సమాచారం ప్ర‌కారం ఛైర్మన్‌గా టీడీపీ సభ్యుడు చెన్నుబోయిన చిట్టిబాబును ఎన్నుకున్న‌ట్టు తెలుస్తోంది. టీడీపీ సభ్యులు చిట్టిబాబు అభ్య‌ర్థిత్వాన్ని బలపరిచారు. దీంతో ఆయన ఛైర్మన్‌గా ఎన్నికయ్యారని సమాచారం. ఎంపీ కేశినేని నాని ఓటుతో టీడీపీకి మెజారిటీ వచ్చింది. వైస్ ఛైర్మన్‌గా చుట్టుకుదురు శ్రీనివాసరావు, మరో వైస్ ఛైర్మన్‌గా కరిపికొండ శ్రీలక్ష్మీకి టీడీపీ సభ్యులు ఆమోదం తెలిపారు. అయితే హైకోర్టు ఆదేశాలతో ఎన్నికల అధికారులు ఫలితాలను ప్రకటించలేదు. కొండపల్లి పురపాలక సంఘ ఎన్నికల్లో వైసీపీ 14 వార్డుల్లో విజయం సాధించగా, ఎక్స్ అఫిషియో సభ్యుడిగా వసంత కృష్ణప్రసాద్‌ ఉన్నప్పటికీ వారి బలం 15కే పరిమితం అయింది. టీడీపీ 14 వార్డుల్లో విజయం సాధించగా, స్వతంత్ర సభ్యురాలి చేరికతో ఆ పార్టీ సభ్యుల సంఖ్య 15కు చేరింది. ఎక్స్ అఫిషియోగా ఎంపీ కేశినేని నానీకి కోర్టు ఓటు హక్కును కల్పించడం తో టీడీపీ బలం 16 కు పెరిగింది. అయితే.. హైకోర్టు ఆదేశాల త‌ర్వాతే ఈ ఎన్నిక‌ను ప్ర‌క‌టించే అవ‌కాశం ఉంది.
