తాళం వేసిన ఇల్లే.. టార్గెట్
1 min read
ఘటనా స్థలిని పరిశీలిస్తున్న పోలీసులు
రూ.17లక్షలు అపహరించిన దుండగులు
– కేసు నమోదు చేసిన గూడురు పోలీసులు
పల్లెవెలుగు వెబ్, గూడూరు : తాళం వేసిన ఇంటినే టార్గెట్ చేస్తూ.. చోరీకి పాల్పడుతున్నారు దుండగలు. కోడుమూరు నియోజకవర్గం గూడురు పట్టణంలో తాళం వేసిన ఇంటిలో చోరీకి పాల్పడిన దుండగులు.. దాదాపు రూ. 17 లక్షలు అపహరించారు. బాధితుడి ఫిర్యాదు మేరకు కేసు నమోదు చేసుకున్న పోలీసులు దర్యాప్తు చేస్తున్నారు. సీఐ శ్రీధర్, ఎస్ఐ నాగార్జున తెలిపిన వివరాలిలా ఉన్నాయి. గూడురు పట్టణానికి చెందిన డాక్యుమెంట్ రైటర్ నజీర్ ఇటీవల తన సొంత స్థలాన్ని విక్రయించగా వచ్చిన డబ్బు ఇంట్లో ఉంచి.. కుటుంబ సభ్యులతో కలిసి ఈ నెల 15న తెలంగాణ రాష్ట్రంలోని రాజోలిలో తమ బంధువుల పెళ్లికి వెళ్లారు. తిరిగి 18వ తేదీ సాయంత్రం వచ్చి చూడగా… తాళం పగులగొట్టి ఇంట్లోని రూ.17 లక్షలు నగదును దుండగలు ఎత్తుకెళ్లినట్లు నజీర్ గుర్తించాడు. వెంటనే పోలీసులకు సమాచారం ఇవ్వగా.. సీఐ శ్రీధర్, ఎస్ఐ నాగార్జున, ట్రైనీ ఎస్ఐ మమత, క్లూస్ టీముతో కలిసి ఘటనా స్థలిని పరిశీలించారు. సీసీ ఫుటేజ్ పరిశీలించి, కేసు నమోదు చేసి దర్యాప్తు చేస్తున్నట్లు ఎస్ఐ నాగార్జున తెలిపారు.
About Author
