పోస్టల్బ్యాలెట్ విషయంలో ఏ కుట్రా లేదు..తప్పుడు విమర్శలు మానుకోవాలి! మంచు విష్ణు
1 min read
పల్లెవెలుగువెబ్, హైదరాబాద్: పోస్టల్బ్యాలెట్ విషయంపై ఏలాంటి కుట్ర లేదని, ప్రకాశ్రాజ్ తప్పడు ఆరోపణలు మానుకోవాలని ‘మా’ ఎన్నికల్లో ఓ ప్యానల్ నుంచి అధ్యక్ష పదవికి పోటీ చేస్తున్న మంచువిష్ణు అన్నారు. మంగళవారం సాయంత్రం ప్రకాశ్రాజ్ చేసిన విమర్శలకు కౌంటర్గా ఆయన మీడియా సమావేశం ఏర్పాటు చేసి మాట్లాడారు. ఎవరికీ తెలియని వ్యక్తులతో పోస్టల్బ్యాలెట్ కోసం కొందరు సీనియర్ నటులకు సంబంధించిన సొమ్ము కట్టామన్న ఆరోపణలో నిజం లేదని విష్ణు స్పష్టం చేశారు. చిత్రపరిశ్రమంలో సుమారు 190మంది 60ఏళ్లుపైబడిన సీనియర్ నటీనటులు ఉన్నారని, సీనియర్ నటులు ఓటింగ్కు రాలేని పక్షంలో పోస్టల్ బ్యాలెట్ ద్వారా రూ.500 చెల్లించి ఓటు హక్కును వినియోగించుకోవచ్చని ఎన్నికల సంఘం చెప్పిందన్నారు. ఈమేరకు తాము కొందరు సీనియర్లను సంప్రదించగా ఎక్కువ శాతం నేరుగా వచ్చి ఓటు వేస్తామన్నారని, కొందరు మాత్రం పోస్టల్ బ్యాలెట్ అడిగారన్నారు. కృష్ణ, కృష్ణంరాజు, శరత్బాబుల ప్రమేయంతోనే వారి డబ్బును ఎన్నికల సంఘానికి చెల్లించామని వివరించారు. అయితే సీనియర్ ఓటర్లకు పోస్టల్ బ్యాలెట్ రుసుం చెల్లించేందుకు సమయం ఇస్తామని, మీరు కట్టిన సొమ్మును తిరిగి తీసుకెళ్లమని ఎన్నికల సంఘం చెప్పిందన్నారు. సినీపెద్దలను అవమానపర్చేలా విమర్శలు చేశారని దుయ్యబట్టారు. నిజం తెలుసుకోకుండా మాట్లాడుతోన్న ప్రకాశ్రాజ్ గతం మర్చిపోయి మాట్లాడుతున్నారని, వ్యక్తిగతంగా కుటుంబాల జోలికి వస్తే ఊరుకోమని హెచ్చరించారు. తాను ఈవీఎం విధానం వద్దని, పేపర్బ్యాలెట్ విధానం కావాలని ఎన్నికల సంఘాన్నికోరినట్లు విష్ణు చెప్పారు. ఈవీఎం విధానం అయితే ఓట్ల ట్యాపరింగ్ అనే విమర్శలు వచ్చే అవకాశం ఉందని, అలాగే పేపర్ బ్యాలెట్ అయితే ఎన్నిసార్లయినా లెక్కబెట్టుకోవచ్చన్నారు. చిత్రపరిశ్రమ ఒక కుటుంబం లాంటిది. ఎన్నికల తర్వాత అందరూ కలిసి ఉండాల్సిన వాళ్లమని, వ్యక్తిగత విమర్శలతో దూరం చేసుకునే పరిస్థితి తేవద్దని సూచించారు.
About Author
