మూడు మండలాలను.. కరవు మండలాలుగా ప్రకటించాలి
1 min read
ఎమ్మిగనూరు, న్యూస్ నేడు: ఎమ్మిగనూరు మండల పరిధిలో రబీ సీజన్‌లో ప్రభుత్వం ప్రకటించిన కరవు మండలాల జాబితాలో ఎమ్మిగనూరు నియోజకవర్గంలోని ఎమ్మిగనూరు రూరల్, గోనెగండ్ల, నందవరం మండలాలను కూడా కరవు మండలాలుగా గుర్తించాలని వైయస్సార్సీపీ రాష్ట్ర రైతు విభాగం అధికార ప్రతినిధి గడ్డం నారాయణరెడ్డి డిమాండ్ చేశారు. కర్నూలు జిల్లాలో మొత్తం 9 మండలాలను కరవు మండలాలుగా ప్రభుత్వం గుర్తించింది. అయితే, ఎమ్మిగనూరు నియోజకవర్గంలో ఉన్న మూడు మండలాలను ప్రభుత్వం పరిగణనలోకి తీసుకోకపోవడం తీవ్ర అన్యాయమని ఆయన పేర్కొన్నారు.కర్నూలు జిల్లాలో 2024-25 రబీ సీజన్‌లో కరవు ప్రభావిత మండలాల జాబితాలో ఆస్పిరి, కల్లూరు, కర్నూలు రూరల్, కర్నూలు అర్బన్, మద్దికెర, ఓర్వకల్లు, గూడూరు, కోడుమూరు, వెల్దుర్తి మండలాలు చేర్చబడ్డాయి. అయితే, “ఎమ్మిగనూరు రూరల్, గోనెగండ్ల, నందవరం మండలాలు” ఈ జాబితాలో లేకపోవడం తీవ్ర అసంతృప్తికి దారి తీస్తోంది. ప్రభుత్వ నిర్లక్ష్య ధోరణి వల్ల అక్కడి రైతులు మరింత ఇబ్బందులకు గురవుతున్నారు.రైతుల పరిస్థితి దయనీయంగా మారింది ఈ మూడు మండలాల్లో వరుసగా వర్షాభావ పరిస్థితులు కొనసాగుతున్నాయి. తగిన వర్షపాతం లేకపోవడంతో రైతుల పంటలు పూర్తిగా దెబ్బతిన్నాయి. ముఖ్యంగా పత్తి, మొక్కజొన్న, చిరుధాన్యాలు, వేరుశెనగ, మరియు ఇతర ప్రధాన పంటలు పూర్తిగా నష్టపోయాయి. సాగునీటి కొరత తీవ్రంగా ఉంది. పైగా, ఈ ప్రాంతాల్లో భూగర్భజలాలు కూడా క్షీణించడంతో తాగునీటి సమస్య మరింత తీవ్రమైంది. రైతులు భూమిని సాగు చేసుకునే పరిస్థితి లేక పంటలు వేసే ధైర్యం చేయలేకపోతున్నారు. సాగునీటి ఎద్దడితో వ్యవసాయ కార్మికులకు ఉపాధి లేకుండా పోయింది. వలసలు పెరిగే పరిస్థితి ఏర్పడుతోంది.నష్టపోయిన రైతులకు తక్షణ న్యాయం చేయాలి కరవు మండలాలుగా గుర్తింపు లభిస్తే, రైతులకు రుణ మాఫీ, ఉచిత విత్తనాలు, ఎరువులు, ఉపశమన చర్యలు లభించేందుకు అవకాశం ఉంటుంది. రాష్ట్ర ప్రభుత్వం తక్షణమే స్పందించి, ఎమ్మిగనూరు రూరల్, గోనెగండ్ల, నందవరం మండలాలను కరవు మండలాలుగా ప్రకటించాలని గడ్డం నారాయణరెడ్డి డిమాండ్ చేశారు. కరవు మండలాలుగా గుర్తించేందుకు ప్రభుత్వ అధికారులు వెంటనే ఈ ప్రాంతాల్లో పర్యటించి వాస్తవ పరిస్థితిని అంచనా వేయాలని ఆయన సూచించారు.ప్రభుత్వం తక్షణమే స్పందించాలి రైతుల సంక్షేమమే ప్రభుత్వ ప్రాధాన్యత కావాలి. ప్రభుత్వం వెంటనే స్పందించి ఈ మూడు మండలాలను కరవు మండలాలుగా ప్రకటించాలి. నష్టపోయిన రైతులకు న్యాయమైన పరిహారం అందించాలి. కరవు ప్రభావిత ప్రాంతాల్లో తాగునీటి సమస్య పరిష్కారానికి ప్రత్యేక పథకాలు తీసుకురావాలి.అంతేగాక, ఈ ప్రాంతాల్లో ఉపాధి హామీ పథకాన్ని పూర్తి స్థాయిలో అమలు చేసి గ్రామీణ కార్మికులకు ఉపాధిని కల్పించాలి. ప్రభుత్వం వెంటనే ఈ విషయాన్ని పరిగణలోకి తీసుకుని తగిన చర్యలు చేపట్టకపోతే, రైతులతో కలిసి పెద్ద ఎత్తున ఉద్యమానికి సిద్ధమని గడ్డం నారాయణరెడ్డి హెచ్చరించారు. రైతుల డిమాండ్లను ప్రభుత్వం పట్టించుకోకపోతే, నిరసన కార్యక్రమాలు మరింత ఉధృతం చేస్తామని ఆయన హెచ్చరించారు.
About Author
