వనమాలి హాస్పిటల్ ఎండీ, మేనేజర్ అరెస్టు
1 min read
– అనుమతి లేకపోయినా.. కోవిడ్ చికిత్స
– రెమ్డిసివర్ ఇంజెక్షన్లు బ్లాక్లో విక్రయం
– డీఎంహెచ్ఓ కార్యాలయ అధికారి ఫిర్యాదుతో కేసు నమోదు
– వివరాలు వెల్లడించిన కర్నూలు డీఎస్పీ మహేష్
పల్లెవెలుగు వెబ్, కర్నూలు: కాసులకు కక్కుర్తి పడి.. కర్నూలు ప్రైవేట్ ఆస్పతుల యాజమాన్యాలు, వైద్యులు ప్రజల ప్రాణాలతో చెలగాటం ఆడుతున్నారు. కోవిడ్ వైద్య చికిత్సకు అనుమతి లేకపోయినా.. వైద్యచికిత్సలు చేస్తూ.. రోగుల నుంచి భారీ మొత్తంలో వసూలు చేస్తున్నారు. కోవిడ్ అనుమతి లేకపోయినా వైద్య చికిత్సలు చేస్తున్నారని, రెమ్డిసివర్ ఇంజెక్షన్లు బ్లాక్లో విక్రయిస్తున్నారన్న ఆరోపణతో కర్నూలు గాయత్రీ ఎస్టేట్లోని వనమాలి హాస్పిటల్ఎండీ రాఘవేంద్ర, మేనేజర్ లవకోటిని అరెస్టు చేసినట్లు డీఎస్పీ కేవీ మహేష్ వెల్లడించారు. శనివారం స్థానిక పోలీస్ స్టేషన్లో ఏర్పాటు చేసిన విలేకరుల సమావేశంలో సీఐలు తబ్రీజ్, పార్థసారధితో కలిసి డీఎస్పీ మహేష్ వివరాలు వెల్లడించారు. డీఎంహెచ్ఓ కార్యాలయ అధికారి వంశీకృష్ణ ఇచ్చిన ఫిర్యాదుతో ఏప్రిల్ 29న డీఎంహెచ్ఓ కార్యాలయ సిబ్బంది, పోలీసులు దాడి చేసి బ్లాక్లో విక్రయించేందుకు సిద్ధంగా ఉంచిన రెమ్ డిసివర్ను స్వాధీనం చేసుకుని, వనమాలి ఆస్పత్రి ఎండీ రాఘవేంద్ర, మేనేజర్ లవకోటిని అరెస్టు చేశామన్నారు. వీరికి ఇంజెక్షన్లు అమ్మిన సంపత్ పరారీలో ఉన్నాడని, త్వరలో పట్టుకుంటామన్నారు.
మరో నలుగురి అరెస్టు
కోవిడ్ రోగులకు అత్యవసరమైన రెమ్డిసివర్ ఇంజెక్షన్లను బ్లాక్లో విక్రయిస్తూ లక్షల రూపాయలు దండుకుంటున్న మరో నలుగురిని అరెస్టు చేశారు. ఈ కేసులో అపెక్స్ ఆస్పత్రి మెడికల్ స్టోర్ అసిస్టెంట్ పేరంపోగు రాజమద్దిలేటి, గాంధీనగర్లో బాలాజి మెడికల్ ఏజెన్సీ నిర్వాహకుడు మేడం బాలాజి కుమార్, మెడికల్ రిప్లు అమత్తలూరు సతీష్ బాబు, కొవ్వూరు విజయ్కుమార్ను కర్నూలు రెండో పట్టణ పోలీసులు అరెస్టు చేశారు. వారి వద్ద నుంచి ఒక ఇంజెక్షన్, నాలుగు సెల్ఫోన్లు స్వాధీనం చేసుకున్నారు. నిందితులపై ఐపీసీ 420, 406 రెడ్ విత్ 34, డిజాస్టర్ మేనేజ్మెంట్ చట్టం 2005 51(బీ),60 (డీ) సెక్షన్ల కింద కేసు నమోదు చేసినట్లు డీఎస్పీ మహేష్ వెల్లడించారు. ఇదే కేసులో బళ్లారికి చెందిన భీమేశ్వర్, కర్నూలు గాయత్రి ఆస్పత్రిలో పని చేసే రాజును అరెస్టు చేయాల్సి ఉందన్నారు.
About Author
