‘నీళ్లు తాగండి’ అన‌డంతో.. 29 వేల‌కోట్లు న‌ష్టపోయిన కొకో కోల‌

ప‌ల్లెవెలుగు వెబ్: కొకొకోల ప్రపంచంలోనే ప్రముఖ బెవ‌రేజెస్ కంపెనీ. అమెరికాలో మొద‌లైన ఈ కంపెనీ ప్రపంచ‌వ్యాప్తంగా త‌న బ్రాండ్ ను విస్తరించింది. కొకొకోల‌కు ప్రజ‌లు బ్రహ్మర‌థం ప‌ట్టారు. కూల్ డ్రింక్ అంటేనే కొకొకోల అని గుర్తుకు వ‌చ్చేంత‌గా ప్రజల్లో గుర్తింపు పొందింది. కొకొకోల కంపెనీలో షేర్లు కొన్న లాంగ్ ట‌ర్మ్ ఇన్వెస్టర్లు సిరులు కురిపించింది ఈ కంపెనీ. అలాంటి కొకొకోల కంపెనీ ఓ ఆట‌గాడు చెప్పిన ఒక్క మాట‌తో 29 వేల కోట్లు న‌ష్టపోయింది. ఈ టోర్నీకి కొకొకోల కంపెనీ స్పాన్సర్ గా వ్యవ‌హ‌రిస్తోంది. యూఈఎఫ్ఏ యూరో 2020 మ్యాచ్ కు ముందు ప్రెస్ మీట్ నిర్వహించారు. పోర్చుగీసు జ‌ట్టు సారథి క్రిస్టియానో రొనాల్డొ , మేనేజ‌ర్ ఫెర్నాండో సాంట‌స్ లు ఈ ప్రెస్ మీట్ లో పాల్గొన్నారు. టోర్నీ స్పాన్సర్ అయినందున కొకొకోలా బాటిల్స్ వారి ప్రెస్ మీట్ టేబుల్ మీద పెట్టారు. క్రిస్టియానొ రొనాల్డొ ఆ రెండు కొకొకోలా బాటిల్స్ ప‌క్కన పెట్టి.. మంచి నీళ్లు తాగండి అని చెప్పారు. దీంతో ఆ మాట‌లు కొకొకోలా షేరు ధ‌ర మీద తీవ్ర ప్రభావం చూపింది. ఆయ‌న వ్యాఖ్యలు సాధార‌ణంగా చేసిన‌ప్పటికీ.. స్టాక్ మార్కెట్ లో కొకొకోలా షేరు ధ‌ర 1.6 శాతం న‌ష్టపోయింది. ఫ‌లితంగా 29 వేల కోట్ల సంప‌ద ఆవిరైంది.

About Author

PALLEVELUGU

See author's posts