త్యాగం, భక్తి, మానవతకు ప్రతీక బక్రీద్ పండుగ
1 min read
హోళగుంద మండలంలో ఘనంగా బక్రీద్ సందేశ సమావేశం
హోళగుందన్యూస్ నేడు: పవిత్ర బక్రీద్ పండుగ త్యాగానికి, అల్లాహ్ పట్ల అపారమైన భక్తికి ప్రతీక అని హోళగుంద మండలానికి చెందిన ప్రముఖ మత పెద్ద మౌలానా సమీవుల్లా జామాయి పేర్కొన్నారు. బక్రీద్ పండుగను పురస్కరించుకుని నిర్వహించిన ప్రత్యేక సమావేశంలో ఆయన మాట్లాడుతూ, ప్రవక్త ఇబ్రాహీం అలైహిస్సలాం అల్లాహ్ ఆజ్ఞకు లోబడుతూ చూపిన విశ్వాసం, త్యాగస్ఫూర్తి ప్రపంచ మానవాళికి ఆదర్శమని తెలిపారు.అల్లాహ్ ఆజ్ఞను గౌరవిస్తూ తనకు అత్యంత ప్రియమైనదాన్ని కూడా త్యాగం చేయడానికి సిద్ధపడిన ప్రవక్త ఇబ్రాహీం అలైహిస్సలాం జీవితం ప్రతి ముస్లింకు మార్గదర్శకమని చెప్పారు. అదే త్యాగ భావనను గుర్తుచేసుకుంటూ ప్రతి సంవత్సరం ముస్లింలు బక్రీద్ పండుగను భక్తిశ్రద్ధలతో జరుపుకుంటారని వివరించారు.బక్రీద్ కేవలం పండుగ మాత్రమే కాకుండా, మానవతా విలువలను పెంపొందించే పవిత్ర దినమని పేర్కొన్నారు. సమాజంలో పేదలు, అనాథలు, అవసరమైన వారిని ఆదుకోవడం ద్వారా నిజమైన ఇస్లాం సందేశాన్ని ఆచరణలో చూపించాలని ఆయన సూచించారు. మన దగ్గర ఉన్న సంపదను ఇతరులతో పంచుకోవడం, అవసరమైన వారికి సహాయం చేయడం, పరస్పరం ప్రేమాభిమానాలతో జీవించడం బక్రీద్ పండుగ ప్రధాన ఉద్దేశమని తెలిపారు.ప్రస్తుత కాలంలో యువత మత బోధనలను సక్రమంగా అర్థం చేసుకుని మంచి మార్గంలో నడవాలని మౌలానా సమీవుల్లా జామాయి పిలుపునిచ్చారు. ద్వేషాలకు, విభేదాలకు దూరంగా ఉండి సోదరభావంతో జీవించాలని, సమాజంలో శాంతి, సామరస్య పరిరక్షణ ప్రతి ఒక్కరి బాధ్యత అని అన్నారు.బక్రీద్ సందర్భంగా ప్రజలు పరిశుభ్రత పాటిస్తూ, ప్రభుత్వ నిబంధనలు గౌరవిస్తూ ప్రశాంత వాతావరణంలో పండుగను నిర్వహించుకోవాలని కోరారు. గ్రామాల్లో ఎటువంటి అపోహలు, వివాదాలు చోటుచేసుకోకుండా పెద్దలు యువతకు మార్గనిర్దేశం చేయాలని సూచించారు.దేశం అభివృద్ధి చెందాలంటే ప్రజల మధ్య ఐక్యత ఎంతో అవసరమని, అన్ని మతాల ప్రజలు పరస్పరం గౌరవించుకోవడం భారతదేశ గొప్ప సంస్కృతికి నిదర్శనమని ఆయన పేర్కొన్నారు. ఈ పవిత్ర బక్రీద్ పండుగ ప్రతి ఇంట ఆనందం, ఆయురారోగ్యాలు, శాంతి, సౌభాగ్యాలను తీసుకురావాలని అల్లాహ్ను ప్రార్థిస్తున్నామని తెలిపారు.ఈ కార్యక్రమంలో మౌలానా హబీబుల్లా జామాయి, సైఫుల్లా జామాయి, కిఫాయితుల్లా జామాయి, జుబేర్ జామాయి, అబూబకర్ సలఫీ, షాకీర్ జామాయి, సుభాన్ జామాయి తదితర మత పెద్దలు పాల్గొన్నారు. అలాగే మండలంలోని పెద్దలు, యువకులు, మహిళలు, చిన్నారులు భారీ సంఖ్యలో హాజరై బక్రీద్ సందేశాలను ఆసక్తిగా విన్నారు.కార్యక్రమం అనంతరం దేశం, రాష్ట్రం, ప్రజల శాంతి భద్రతలు, సుఖసంతోషాల కోసం ప్రత్యేక ప్రార్థనలు నిర్వహించారు.
About Author
