అర్హులైన ప్రతి రైతుకు రుణాలు
1 min read
ఎన్‌పీఏల తగ్గింపుపై ప్రత్యేక దృష్టి సారించాలి
18 శాతం వ్యాపార వృద్ధి లక్ష్యంగా పనిచేయాలి
ఆప్కాబ్‌ ఎండీ ఆర్‌.వి. రామకృష్ణ
కర్నూలు, న్యూస్ నేడు : సహకార బ్యాంకుల ద్వారా అర్హులైన రైతులకు వ్యవసాయ రుణాలు అందించడంతోపాటు, బ్యాంకు రుణ పథకాలపై ప్రజలకు విస్తృత అవగాహన కల్పించాలని ఆప్కాబ్‌ మేనేజింగ్‌ డైరెక్టర్‌ ఆర్‌.వి. రామకృష్ణ సూచించారు. రుణాల సకాలంలో వసూళ్లు, నిరర్థక ఆస్తుల (ఎన్‌పీఏ) తగ్గింపు, బ్యాంకు లాభదాయకత పెంపునకు ప్రాధాన్యం ఇవ్వాలని స్పష్టం చేశారు.రైతులు, స్వయం సహాయక సంఘాలు, చిన్న, మధ్య తరహా వ్యాపారులకు అవసరమైన ఆర్థిక సహాయం అందించడంలో సహకార బ్యాంకులు కీలక పాత్ర పోషించాలని రామకృష్ణ అన్నారు. శుక్రవారం కేడీసీసీ ప్రధాన కార్యాలయంలో నిర్వహించిన పాత్రికేయుల సమావేశంలో ప్రత్యేకంగా మాట్లాడుతూ అర్హులైన వారికి నిబంధనల ప్రకారం రుణాలు మంజూరు చేయడంతోపాటు, రుణాల వినియోగం, తిరిగి చెల్లింపులపై అవగాహన కల్పించాలన్నారు.
రుణాల వసూళ్లపై ప్రత్యేక దృష్టి
బ్యాంకు ఆర్థిక బలోపేతానికి రుణాల వసూళ్లు కీలకమని పేర్కొన్నారు. రుణగ్రహీతలతో నిరంతరం సంప్రదింపులు జరుపుతూ బకాయిలను సకాలంలో వసూలు చేయాలని సూచించారు. ఎన్‌పీఏ ఖాతాలపై ప్రత్యేక దృష్టి సారించి, వాటి తగ్గింపునకు సమర్థవంతమైన చర్యలు చేపట్టాలని తెలిపారు. రుణాల వసూళ్లలో అధికారులు, సిబ్బంది సమన్వయంతో పనిచేయాలని సూచించారు.
ఖాతాదారులకు మెరుగైన సేవలు
బ్యాంకు లాభదాయకతను పెంచేందుకు వడ్డీ ఆదాయం, ఇతర ఆదాయ మార్గాలు, నిర్వహణ వ్యయాల మధ్య సమతుల్యత పాటించాలని రామకృష్ణ తెలిపారు. బ్యాంకు వనరులను సమర్థవంతంగా వినియోగించుకుంటూ ఖాతాదారులకు వేగవంతమైన, పారదర్శకమైన, నమ్మకమైన సేవలు అందించాలని సూచించారు. ఆధునిక బ్యాంకింగ్‌ సదుపాయాలను ప్రజలకు అందుబాటులోకి తీసుకురావాలని పేర్కొన్నారు.
18 శాతం వ్యాపార వృద్ధి లక్ష్యం
బ్యాంకు అభివృద్ధికి ప్రతి శాఖ, అధికారి, ఉద్యోగి సమష్టిగా కృషి చేయాలని ఆప్కాబ్‌ ఎండీ సూచించారు. రాబోయే ఆర్థిక సంవత్సరానికి 18 శాతం వ్యాపార వృద్ధి లక్ష్యాన్ని నిర్దేశించుకుని, అందుకు అనుగుణంగా కార్యాచరణ ప్రణాళికను అమలు చేయాలని తెలిపారు. సహకార బ్యాంకులను మరింత బలోపేతం చేస్తూ ప్రజలకు మెరుగైన సేవలు అందించాలని సూచించారు. సమావేశంలో ఆప్కాబ్‌ డిప్యూటీ జనరల్‌ మేనేజర్‌ టి. దినేష్, డీసీసీబీ ముఖ్య కార్యనిర్వహణాధికారి సి.ఎన్‌.ఆర్‌.ఎస్‌. బాలాజీ రావు, డీసీసీబీ జనరల్‌ మేనేజర్‌ పి. రామాంజనేయులు, సహకార సంఘం అధ్యక్షుడు డి. శేఖర్, సీఈఓ పుల్లయ్య, క్రెడిట్‌ గ్రాంట్‌ బ్రాంచ్‌ హెడ్‌ ఎం. రూపాదేవి, ఇతర సహకార బ్యాంకు అధికారులు, సిబ్బంది పాల్గొన్నారు
About Author
