“వికసిత్ భారత్ యూత్ పార్లమెంట్” కార్యక్రమం
1 min read
కర్నూలు, న్యూస్ నేడు: యూత్ పార్లమెంటులో పాల్గొనడం ద్వారా ప్రజాస్వామ్య వ్యవస్థలతోపాటు రాజ్యాంగానికి సంబంధించిన విషయాలపట్ల యువతకు అవగాన కలుగుతుందని రాయలసీమ విశ్వవిద్యాలయ వైస్ఆఛాన్స్లర్ ఆచార్య వి. వెంకట బసవరావు అభిప్రాయపడ్డారు. భారత ప్రభుత్వ యువజన సర్వీసుల శాఖతోపాటు, రాయలసీమ యూనివర్సిటీ ఎన్ఎస్ఎస్ విభాగం మరియు సుంకేసుల రోడ్డులోని సెయింట్ జోసఫ్ కాలేజీల సంయుక్త నిర్వహణలో జరిగే “వికసిత్ భారత్ యూత్ పార్లమెంట్” కార్యక్రమ రిజిస్ట్రేషన్లకు సంబంధించిన పోస్టర్ను వైసాఛాన్స్లర్ విడుదలచేశారు. “వికసిత భారతంకోసం ఒకేదేశం ఒకే ఎన్నికలు” అనే అంశంమీద జరిగే ఈ యూత్ పార్లమెంట్లో పాల్గొనడానికి 18 నుండి 25 సంవత్సరాలలోపు వయసుగల యువతీయువకులు అర్హులన్నారు. ఆసక్తి ఉన్న యువత https: //mybharath.gov.in అనే వెబ్సైటులో ఈ నెల 16 వ తేదీ వరకు రిజిస్ట్రేషన్ చేసుకోవచ్చన్నారు. రిజిస్ట్రేషన్ సమయంలోనే ఇదే అంశానికి సంబంధించి 1 నిమిషానికి తక్కువకాకుండా విడియోను తెలుగు, హిందీ లేదా ఇంగ్లీషులో రూపొందించి అప్లోడ్ చేయాల్సి ఉంటుందన్నారు. కార్యక్రమానికి ఎంపికైన విద్యార్థుల వివరాలను ఆయా కళాశాలలతోపాటు విద్యార్థినీ విద్యార్థులకు తెలపడం జరుగుతుందన్నారు. ఉమ్మడి కర్నూలు జిల్లాస్థాయిలో జరిగే ఈ పోటీల్లో ఎంపికైన విద్యార్థులు రాష్ట్రస్థాయికి, అక్కడినుండి జాతీయస్థాయికి వెళ్లే అవకాశం ఉంటుంది కాబట్టి ఈ అవకాశాన్ని సద్వినియోగం చేసుకోవలసినదిగా కర్నూలు నంద్యాల జిల్లాలకు చెందిన విద్యార్థినీ విద్యార్థులకు ఆచార్య బసవరావు పిలుపునిచ్చారు. ఈ కార్యక్రమంలో వర్సిటీ రెక్టార్ ఆచార్య ఎన్.టి.కె. నాయక్, రిజిస్ట్రార్ డాక్టర్ బి. విజయ్ కుమార్ నాయుడుతో పాటు వర్సిటీ ఎన్ఎస్ఎస్ ప్రోగ్రాం కోఆర్డినేటర్ డాక్టర్ పి. నాగరాజు, ప్రోగ్రాం ఆఫీసర్లు డాక్టర్ కె. వెంకటరత్నం, డాక్టర్ బి. విజయుడు, డాక్టర్ నాగచంద్రుడు, శివప్రసాదరెడ్డి పాల్గొన్నారు.
About Author
