మాదిగ సమాజ చైతన్యానికి ‘గో టు విలేజ్’ కార్యక్రమం ప్రారంభం
1 min read
జూన్ 6 నుంచి హోళగుంద మండల వ్యాప్తంగా గ్రామాల వారీగా కార్యాచరణ
ప్రతి మాదిగవాడకు చేరుకుని సమస్యల పరిష్కారానికి కృషి
విద్య, ఉపాధి, హక్కుల సాధనపై విస్తృత అవగాహన కల్పించనున్న నాయకులు
ఎమ్మార్పీఎస్, ఎం.ఎస్.పీ నాయకుల సమావేశంలో కార్యాచరణ ప్రణాళిక ఖరారు
హోళగుంద, న్యూస్ నేడు : మాదిగ సమాజ సామాజిక, ఆర్థిక, విద్యా అభ్యున్నతిని లక్ష్యంగా పెట్టుకుని హోళగుంద మండలంలో “గో టు విలేజ్” కార్యక్రమాన్ని చేపట్టనున్నట్లు ఎమ్మార్పీఎస్, ఎం.ఎస్.పీ నాయకులు ప్రకటించారు. ఈ మేరకు హోళగుంద మండల కేంద్రంలో ఈరోజు నిర్వహించిన ముఖ్య నాయకుల సమావేశంలో కార్యక్రమ అమలుపై విస్తృతంగా చర్చించి కార్యాచరణ ప్రణాళికను ఖరారు చేశారు.ఈ సందర్భంగా నాయకులు మాట్లాడుతూ, మండలంలోని ప్రతి గ్రామంలోని మాదిగవాడకు చేరుకుని ప్రతి గడపను సందర్శిస్తూ ప్రజల సమస్యలను నేరుగా తెలుసుకోవడంతో పాటు ప్రభుత్వ సంక్షేమ పథకాలపై అవగాహన కల్పించనున్నట్లు తెలిపారు. ముఖ్యంగా మాదిగ విద్యార్థులు విద్యలో వెనుకబడకుండా ఉన్నత విద్యను అభ్యసించి ఉద్యోగ, ఉపాధి అవకాశాలను అందిపుచ్చుకునేలా ప్రోత్సహించనున్నట్లు పేర్కొన్నారు.మాదిగ సమాజాన్ని మరింత సంఘటితం చేయడం, యువతలో నాయకత్వ లక్షణాలను పెంపొందించడం, మహిళలకు అన్ని రంగాల్లో అవకాశాలు కల్పించడం, హక్కుల సాధన కోసం ప్రజల్లో చైతన్యం పెంపొందించడం ఈ కార్యక్రమం ప్రధాన ఉద్దేశ్యమని నాయకులు వివరించారు.దశాబ్దాలుగా కొనసాగుతున్న సామాజిక వివక్ష, నిర్లక్ష్యాన్ని ఎదుర్కొంటూ మాదిగ సమాజం విద్య, ఐక్యత, చైతన్యంతోనే అభివృద్ధి సాధించగలదని అభిప్రాయపడ్డారు. ప్రతి గ్రామంలో సమావేశాలు నిర్వహించి సామాజిక మార్పుకు బాటలు వేయాలని నిర్ణయించారు.ఈ నెల 6వ తేదీ నుంచి హోళగుంద మండల వ్యాప్తంగా “గో టు విలేజ్” కార్యక్రమాన్ని ప్రారంభించి, గ్రామాల వారీగా రూపొందించిన రూట్ మ్యాప్ ప్రకారం కార్యాచరణను అమలు చేయనున్నట్లు తెలిపారు.ఈ సమావేశంలో ఎమ్మార్పీఎస్ మండల అధ్యక్షులు కెంచప్ప, ఎం.ఎస్.పీ మండల అధ్యక్షులు దేవప్ప, జిల్లా కమిటీ సభ్యులు పక్కిరప్ప, ఆలూరు నియోజకవర్గ కో-ఇన్చార్జి మల్లికార్జున, డివిజన్ నాయకులు వెంకటేష్, మండల కమిటీ సభ్యులు గోవర్ధన్, దుర్గాప్రసాద్, తిక్కప్ప, మల్లి, నగేష్, రుతి, బసవరాజు, రమేష్, బసప్ప తదితరులు పాల్గొన్నారు.
About Author
