ఈ నెల 5 న మంగళ కైశిక ద్వాదశి వ్రతం
1 min read
– దాస వైభవాన్ని చాటి చెప్పుటకే మంగళకైశిక ద్వాదశి కార్యక్రమం
పల్లెవెలుగు, వెబ్ ఆళ్ళగడ్డ: దాస వైభవాన్ని చాటి చెప్పుటకు తిరుమల తిరుపతి దేవస్థానములు హిందూ ధర్మ ప్రచార పరిషత్ ఆధ్వర్యంలో ఉమ్మడి కర్నూలు జిల్లా లోని నాలుగు దేవాలయాలు కేంద్రంగా మంగళ కైసిక ద్వాదశి కార్యక్రమాలు ఏర్పాటు చేసినట్లు తిరుమల తిరుపతి దేవస్థానములు హిందూ ధర్మ ప్రచార పరిషత్తు కార్యనిర్వాహకులు డాక్టర్ మల్లు వేంకటరెడ్డి తెలిపారు. ఇందుకు సంబంధించిన పుస్తకాలను, ప్రచురణ సామాగ్రిని స్థానిక భక్తులతో కలిసి ఆవిష్కరించారు. ఈ సందర్భంగా వారు మాట్లాడుతూ భారతీయ సమాజంలో ప్రతి కులానికి ఒక విశిష్టత ఉన్నదని, ప్రతి కులంలో ఒక మహా పురుషుడు జన్మించి మొత్తం సమాజానికి సరైన దారి చూపించారని, అటువంటి మహనీయుల జీవితాలను నేటి సమాజానికి ఆదర్శంగా చూపించుటకే తిరుమల తిరుపతి దేవస్థానములు హిందూ ధర్మ ప్రచార పరిషత్ ఎన్నెన్నో కార్యక్రమాలు నిర్వహిస్తున్నదని అన్నారు. ఇందులో భాగంగానే మాల దాసరిగా నేడు అందరి చేత పూజలందుకుంటున్న సత్యమూర్తి చాలా గొప్ప వైష్ణవ భక్తుడని, సత్యనిష్ఠ గొప్పతనాన్ని చాటిన మహనీయుడని, మంగళకైసికి అనే రాగంతో శ్రీమహావిష్ణువును ప్రత్యక్షం చేసుకున్న భక్త శిఖామని అని వారు వివరించారు. వారి ధార్మిక జీవనానికి సంబంధించిన చరిత్రను సమాజానికి తెలుపుటకు ,భక్తి వైభావాన్ని చాటుటకు ఈ కార్యక్రమాన్ని ఏర్పాటు చేసినట్లు వివరించారు. నంద్యాల జిల్లాలో ఆళ్లగడ్డ బస్టాండ్ సమీపంలో ఉన్న శ్రీరామాలయం, నంద్యాల పట్టణంలోని గోపాల్ నగర్, నందు, కర్నూలు జిల్లాలోని సి.బెళగల్ శ్రీ చింతల ముని నల్లారెడ్డి స్వాముల దేవస్థానం, గోనెగండ్ల మండలం, అయ్యకొండ గ్రామంలోని శ్రీ చింతల ముని నల్లారెడ్డి స్వాముల దేవస్థానం, శ్రీఆంజనేయ స్వామి దేవస్థానము నందు ఈ నెల 5వ తేదీ ఉదయం 9 గంటల నుండి ఈ మంగళ కైశిక ద్వాదశి కార్యక్రమం ఒక ఉత్సవం లాగా భక్తులందరూ కలిసి జరుపుకుంటారని వివరించారు. ఈ కార్యక్రమంలో ఆలయ కమిటీ చైర్మన్ బత్తుల శేషపాములేటి, ధర్మ ప్రచార మండలి సభ్యులు టి.వి. వీరాంజనేయరావు, దాస కమ్యూనిటీ సంఘం సభ్యులు ఒ.తిరుమలయ్య, చెన్నకేశవ పరియోజన ప్రముఖ్ పి రామ నరసింహులు, బి.రాజు, వై బాల శేషయ్య, జె. మల్లికార్జున, బి.ప్రసాదు, పద్మావతి , పద్మలత, వెంకటలక్ష్మి , శ్రావణి, లక్ష్మి, భూమా శివారెడ్డి తదితరులు పాల్గొన్నారు.
About Author
