‘అమీలియో’లో… అరుదైన కంటి శస్ర్తచికిత్స
1 min read
కార్నియా(నల్లగుడ్డు), శుక్లము మార్పిడి
పల్లెవెలుగు వెబ్:కర్నూలు నగరంలోని అమీలియో హాస్పిటల్లో వైద్యులు అరుదైన శస్ర్తచికిత్స చేసి.. రికార్డు సాధించారు. డా.వైఎస్సార్ ఆరోగ్య శ్రీ పథకం కింద ఆస్పత్రిలో కార్నియా స్పెషలిస్ట్ డా. ఎస్. మునీరాబేగం ‘ కార్నియా(నల్లగుడ్డు) మరియు శుక్లమును ఒకే శస్త్రచికిత్స ద్వారా మార్పు చేశారు. రోగికి కంటి చూపు ప్రసాదించారు. శనివారం విడుదల చేసిన ఓ ప్రకటనలో వివరాలు వెల్లడించారు. కర్నూలు జిల్లా, సి.బెళగల్ మండలం , మారందొడ్డి గ్రామానికి చెందిన కె. దస్తగిరి 20 ఏళ్ల క్రితం ప్రమాదవశాత్తు కుడికంటికి దెబ్బ తగిలి.. చూపు క్షీణిస్తూ వచ్చింది. ఆరు నెలల క్రితం అదే కుడి కంటికి పేడ పురుగు తగలడంతో ఇన్ఫెక్షన్ సోకి, నల్లగుడ్డు ( కార్నియా ) తెల్లమచ్చలా ఏర్పడి పూర్తిగా చూపు కోల్పోయాడు. వారం రోజుల క్రితం చికిత్స కోసం అమీలియా ఆస్పత్రికి వచ్చారు. రోగికి వైద్యపరీక్షలు చేసిన డా. మునీరాబేగం …. శస్త్రచికిత్స చేయాలని నిర్ధారించింది. డా. వైఎస్ ఆర్ ఆరోగ్య శ్రీ పథకం కింద డా. ఎల్.వి. ప్రసాద్ ‘ఐ’ ఇన్స్టిట్యూట్ హైదరాబాద్ వారి కార్నియా బ్యాంకు నుంచి నల్లగుడ్డు తెప్పించి… ఈ నెల 13న నల్లగుడ్డు మార్పిడితోపాటు శుక్లము ఆపరేషన్ చేశారు. రోగికి కంటి చూపు ప్రసాదించారు. ఈ సందర్భంగా అమీలియో ఆస్పత్రి ఎండి. డా. చాపె ప్రసాద్ మాట్లాడుతూ డా. వైఎస్సార్ ఆరోగ్య శ్రీ పథకం ద్వారా మరిన్ని ఉన్నతమైన కంటి వైద్యసేవలు అందించడానికి సిద్ధంగా ఉన్నామని, అంతేకాక కాటరాక్ట్ మరియు అన్ని రకాల కార్నియా సమస్యలకు నిపుణులైన వైద్యులు ఆస్పత్రిల్లో అందుబాటులో ఉన్నారని తెలిపారు. కార్నియా సమస్యలు ఉన్నవారు ఇప్పుడు మహానగరాలకు వెళ్లాల్సిన అవసరం లేదన్నారు. అమీలియో హాస్పిటల్లో డా.వైఎస్సార్ ఆరోగ్య శ్రీ కింద మెరుగైన వైద్యసేవలు అందిస్తామన్నారు ఆస్పత్రి ఎండి. డా. చాపె ప్రసాద్. అనంతరం రోగి దస్తగిరి మాట్లాడుతూ కంటి చూపు కోల్పోయిన తనకు రెండు శస్ర్తచికిత్సలు నిర్వహించి కంటి చూపును ప్రసాదించిన డా. మునీరాబేగం, అమీలియో ఆస్పత్రి ఎండి. డా. ప్రసాద్ కు కృతజ్ఞతలు తెలియజేశారు.
About Author
