అవకాశం వస్తే...టీడీపీ కర్నూలు ఎంపీ అభ్యర్థిగా బరిలోకి...

ప్రజా వైద్యుడిగా గుర్తింపు…

రాష్ట్ర స్థాయిలో అవార్డులు… కేంద్రం నుంచి ప్రశంసలు పొందిన వైద్యశాలి..
కర్నూలు ఎంపీ టిక్కెట్… బీసీలకే ఇవ్వాలని నిర్ణయించుకున్న టీడీపీ అధినేత
సర్వేల మీద సర్వేలు చేయిస్తున్న వైనం..
టీడీపీ అధిష్టానం ఆదేశిస్తే… రాజకీయ రంగ ప్రవేశం…?
25 ఏళ్లుగా వైద్య సేవ చేశా…
అవకాశం వస్తే…ప్రత్యక్ష రాజకీయాల్లోకి…
ప్రభుత్వ సర్వజన ఆస్పత్రి రిటైర్డు సూపరింటెండెంట్, సీనియర్ కార్డియాలజిస్ట్,

హార్ట్ అండ్ బ్రెయిన్ మల్టీ సూపర్ స్పెషాలిటీ అధినేత డాక్టర్ చంద్రశేఖర్

వైద్య సేవే పరమావధిగా… ఆస్పత్రే దేవాలయంగా …. రోగులే దేవుళ్లుగా భావించి …. 25 ఏళ్లుగా వైద్య సేవలు అందిస్తూ… సక్సెస్ ఫుల్ డాక్టరుగా పేరుగాంచిన ప్రభుత్వ సర్వజన ఆస్పత్రి సీనియర్ గుండె వైద్య నిపుణులు డా. చంద్రశేఖర్…. రాజకీయ రంగ ప్రవేశంపై ఆసక్తి చూపుతున్నారు. ప్రభుత్వ సర్వజన ఆస్పత్రి సూపరింటెండెంట్, మెడికల్ కాలేజి ప్రిన్సిపల్, సీనియర్ కార్డియాలజిగా ప్రజలకు విశేష వైద్య సేవలు అందించిన డా. చంద్రశేఖర్ … గతేడాది పదవీ విరమణ పొందిన విషయం అందరికీ తెలిసిందే. ప్రస్తుతం సార్వత్రిక ఎన్నికల నేపథ్యంలో … టీడీపీ అధిష్టానం ఆదేశిస్తే… కర్నూలు ఎంపీ అభ్యర్థిగా బరిలో నిలిచేందుకు సిద్ధంగా ఉన్నారు.

పల్లెవెలుగు, కర్నూలు: వైద్య విద్యాభ్యాసంలో ఉన్నత శిఖరాలను అధిరోహించిన డా. చంద్రశేఖర్… ప్రభుత్వ వైద్యుడిగా అంచెలంచెలుగా ఎదుగుతూ … ఎందరికో ఆదర్శంగా నిలిచారు. కర్నూలు ప్రభుత్వ సర్వజన ఆస్పత్రిలో దాదాపు 25 ఏళ్లుగా వైద్య సేవలు అందించి మంచి పేరు సంపాదించారు. ప్రభుత్వ ఆస్పత్రి సూపరింటెండెంట్గా, మెడికల్ కాలేజి ప్రిన్సిపల్గా, సీనియర్ కార్డియాలజిస్ట్గా, అడిషనల్ డీఎంఈగా … ఇలా ఎన్నో ఉన్నత పదవులను … స్వీకరించిన డా. చంద్రశేఖర్ కు కర్ణాటక, తెలంగాణ, ఆంధ్రప్రదేశ్లో ఎంతో మంచి పేరు ఉందని చెప్పవచ్చు.

హాస్పిటల్లో…అభివృద్ధి ఫలాలు..:

1997లో కర్నూలు ప్రభుత్వ ఆస్పత్రిలో అసిస్టెంట్ ప్రొఫెసర్గా విధులు స్వీకరించిన నాటి నుంచి ఆస్పత్రిలో అభివృద్ధి పరుగులు తీసింది. నిత్యం ఆస్పత్రి అభివృద్ధి వైపు ఆలోచించే డా. చంద్రశేఖర్… 2000వ సంవత్సరంలో ఐసీసీయూను మంజూరు చేయించారు. ఇప్పటికీ ఆ విభాగం సక్సెస్ ఫుల్గా నడుస్తోంది. అంతేకాక ఆ విభాగంలోనే క్యాథలాక్ యూనిట్ ఏర్పాటు చేసి.. రోగులకు యాంజియోగ్రామ్లు, యాంజియో ప్లాస్లిలు స్టంట్స్ వేశారు. అదేవిధంగా శిథిలమై… మూలనపడిన కార్డియో థెరాసిక్ విభాగాన్ని పున: ప్రారంభించారు. ప్రస్తుతం అందులో గుండె శస్ర్తచికిత్సలు విజయవంతంగా కొనసాగుతున్నాయి.

మహానుభావుల స్ఫూర్తితో…:

వైద్యరంగంలోని వివిధ శాస్ర్తవేత్తలను… భావితరాల వైద్య విద్యార్థులు స్ఫూర్తిగా తీసుకోవాలని…. స్మరించుకోవాలన్న ఉద్దేశ్యంతో కర్నూలు సర్వజన ఆస్పత్రి, మెడికల్ కళాశాలలో దాదాపు 20 కి పైగా విగ్రహాలను ఆవిష్కరింపజేశారు. 2020లో రాష్ట్ర గవర్నర్ విశ్వభూషణ్ చేతుల మీదుగా డా. అబ్దుల్ కలాం విగ్రహాన్ని ఆవిష్కరింపజేశారు. ఆ తరువాత డా. చంద్రశేఖర్ను రాష్ట్ర గవర్నర్ అభినందించారు.

సేవకు గుర్తింపు… గోల్డ్ మెడల్…:

రాయలసీమ ముఖద్వారమైన కర్నూలులోని ప్రభుత్వ సర్వజన ఆస్పత్రిలో 25 ఏళ్లుగా రోగులకు విశిష్ట సేవలు అందించిన కార్డియాలజిస్ట్ , అడిషనల్ డీఎంఈ డా. చంద్రశేఖర్కు అరుదైన గౌరవం దక్కింది. 2019లో కర్నూలు జిల్లా ఇండియన్ రెడ్ క్రాస్ సొసైటీలో అత్యధికంగా మెంబర్స్ ను చేర్పించడం.. యువతతో రక్తదానం చేయించడం… అవగాహన కల్పించడం.. ప్రభుత్వ సంక్షేమ పథకాలు ప్రజలకు చేరవేయడంలో సఫలమైన డా. చంద్రశేఖర్కు బంగారు పతకం వరించింది. సేవలకు గుర్తింపుగా గవర్నర్ ఆఫీస్ రాజభవన్ దర్బార్ హాల్ నందు ప్రభుత్వ వైద్యశాల కార్డియాలజిస్ట్, అడిషనల్ డీఎంఈ డా.పి. చంద్రశేఖర్ .. రాష్ట్ర గవర్నర్ విశ్వభూషణ్ హరిచందన్ చేతుల మీదుగా బంగారు పతకం అందుకున్నారు.

లైఫ్ టైమ్ అచీవ్మెంట్… అవార్డు గ్రహిత..:

ప్రభుత్వ సర్వజన ఆస్పత్రిలో గుండె హృద్రోగులకు విశేష సేవలు అందించి.. వేలాది మంది ప్రాణాలు కాపాడిన సీనియర్ కార్డియాలజిస్ట్ డా. చంద్రశేఖర్ 2023 జూన్ 22న ఏపీ కార్డియాలజికల్ సొసైటీ వారు లైఫ్ టైమ్ అచీవ్మెంట్ అవార్డు అందించారు.

డాక్టర్లకు…ఆదర్శం..:

కర్నూలు ప్రభుత్వ ఆస్పత్రిలో 25 ఏళ్లుగా గుండె వైద్యనిపుణులుగా పని చేసి.. లక్షల మందికి ప్రాణదాతగా నిలిచిన కార్డియాలజిస్ట్, అడిషనల్ డీఎంఈ డా. పి. చంద్రశేఖర్ను జూనియర్, సీనియర్ వైద్యులు ఆదర్శంగా తీసుకోవాల్సిన అవసరం ఎంతైనా ఉంది. జనహృదయాలను అర్థం చేసుకుని..వైద్యచికిత్సలు అందించే మనసున్న వ్యక్తిగా గుర్తింపు పొందారు. రాయలసీమలోనే కాక తెలంగాణలోని మహబూబ్నగర్ , కర్ణాటకలోని రాయచూరు జిల్లా వాసుల మదిలో చెరగని ముద్ర వేసుకున్నారనడంలో సందేహం లేదు.

సేవకు… బానిస..:

నిస్వార్థపరుడు… నిగర్వి…విద్యావంతుడు… వైద్యవృత్తిలో విజయవంతమైన గుండె వైద్య నిపుణుడిగా పేరుగాంచిన డా. చంద్రశేఖర్ సేవకు మాత్రం బానిసయ్యారు. వైద్య సేవల కోసం.. గుండె హృద్రోగ సమస్యలతో వచ్చే .. పేద బడుగు బలహీన వర్గాల ప్రజలకు నిత్యం అందుబాటులో ఉంటూ .. కార్పొరేట్ స్థాయిలో వైద్య సేవలు అందించారు. అదేవిధంగా కర్నూలు హార్ట్ ఫౌండేషన్ ఆధ్వర్యంలో మెడికల్ విద్యార్థులకు వివిధ వ్యాధులకు సంబంధించి అవగాహన కల్పిస్తూనే ఉన్నారు.

ఓ మంత్రి… కక్ష సాధింపు…!

ప్రభుత్వ ఆస్పత్రి సూపరింటెండెంట్గా విధులు నిర్వహిస్తున్న సమయంలో… వందల కోట్ల రూపాయలతో వివిధ భవనాలను నిర్మించిన ఘనత డా. చంద్రశేఖర్కే దక్కింది. ఆస్పత్రి అభివృద్ధి అంటే ఆయన హయాంలోనే జరిగింది. అది చూసి ఓర్వలేని ఓ సామాజిక వర్గానికి చెందిన వారు వైసీపీ నేతలను ఆశ్రయించి.. తనను ఇరకాటంలో పెట్టారు. తనపై టీటీపీ ముద్ర వేసి.. తన ఉద్యోగ రీత్యా ఇబ్బందులు పెట్టారు. పదోన్నతులు ఆపారు. జిల్లాకు చెందిన ఓ మంత్రి తనపై కక్ష సాధింపు చర్యలు తీసుకున్నారని బహిరంగంగానే ఆరోపించారు డా. చంద్రశేఖర్.

రాజకీయ అరంగేట్రం…:

వైద్య వృత్తిలో ఎంతో మంచి పేరు సంపాదించిన డా. చంద్రశేఖర్… రాష్ట్ర స్థాయిలో అవార్డులు.. కేంద్రం నుంచి ప్రశంసలు కూడా పొందారు. 2023 ఆగస్టు 31న ఆయన పదవీ విరమణ పొందారు. పదవీ విరమణ తరువాత కూడా ఆయన హార్ట్ ఫౌండేషన్ ఆధ్వర్యంలో మెడికల్ విద్యార్థులకు వివిధ వ్యాధులపై సంబంధిత వైద్యులతో అవగాహన సదస్సు నిర్వహిస్తూనే ఉన్నారు. సీనియర్, జూనియర్ వైద్యులతోపాటు మెడికల్ విద్యార్థులందరూ ఆయనకు మద్దతు తెలుపుతున్నారు. ఈ క్రమంలో తనకు టీడీపీ అధిష్ఠానం ఆదేశిస్తే… కర్నూలు ఎంపీ బరిలో నిలిచి… గెలుపొందుతానని ధీమా వ్యక్తం చేశారు.

బీసీలకే… ఎంపీ టిక్కెట్…:

టీడీపీ అధినేత నారా చంద్రబాబు నాయుడు ఇటీవల జిల్లా పర్యటనకు వచ్చిన సందర్భంగా రాయలసీమలో బీసీలకే పెద్దపీఠ వేస్తానని మాట ఇచ్చారు. అందులో భాగంగానే కర్నూలు, నంద్యాల జిల్లాల పార్లమెంట్ అధ్యక్షులుగా బీసీలనే కూర్చోబెట్టారు. ఈ క్రమంలోనే ప్రతి నియోజకవర్గంలోనూ వీలైనంత వరకు బీసీలకే అవకాశం కల్పిస్తానని భరోసా కల్పించారు. ప్రస్తుతం బీజేపీ–జనసేన– టీడీపీ కూటమిలో భాగంగా ఎంపీ టిక్కెట్ టీడీపీ అభ్యర్థికే ప్రకటించే అవకాశం ఉంది. ఈ నేపథ్యంలో ఎంపీ టిక్కెట్ ఆశించే వారంతా … టీడీపీ పెద్దల చుట్టూ ప్రదక్షిణలు చేస్తున్నారు. ధన, జన బలంతోపాటు విద్యావంతులకే ఎంపీ టిక్కెట్ ఇచ్చే ఆలోచనలో టీడీపీ అధిష్ఠానం ఆలోచిస్తున్నట్లు తెలుస్తోంది. ప్రస్తుతం సర్వేల మీద సర్వేలు కొనసాగుతున్నాయి. ప్రజా అభిష్టం మేరకు ఎంపీ టిక్కెట్ ఇచ్చేందుకు టీడీపీ అధినేత చంద్రబాబు నాయుడు సంసిద్ధంగా ఉన్నట్లు విశ్వసనీయ సమాచారం.