విద్యుత్ షాక్ తో ఇద్దరు మృతి
1 min read
పల్లెవెలుగు వెబ్ మహానంది: మండలంలోని తిమ్మాపురం, కృష్ణ నంది సమీపంలో ఐదు మామిడి చెట్ల వద్ద విద్యుత్ షాక్ తో ఇద్దరు మృతి చెందినట్లు స్థానికులు తెలిపారు. స్థానికులు తెలిపిన వివరాల మేరకు అరటి గెలలను డీసీఎం వ్యాన్ లో నింపిన అనంతరం వస్తుండగా ప్రమాదవశాత్తు అరటి గెల యొక్క తొండం 11 కెవి విద్యుత్ వైర్ ను తాకడంతో ప్రమాదం సంభవించినట్లు తెలిపారు. డ్రైవర్ రాఘవేంద్ర మరియు కూలీ పనికి వెళ్లిన అబ్బీపురం గ్రామానికి చెందిన నాగూర్ భాష ఇద్దరు అక్కడికక్కడే మృతి చెందినట్లు పేర్కొన్నారు. మండల విద్యుత్ శాఖ ఏఈ ప్రభాకర్ రెడ్డి సంఘటన స్థలాన్ని పరిశీలించిన అనంతరం ఆయన మాట్లాడుతూ 11 కెవి విద్యుత్ లైన్ ను అరటి గెల తాకిన సందర్భంలో వాహనంలో ఉన్న ఇద్దరు వ్యక్తులు వాహనం నుండి దూరంగా దూకి ఉండి ఉంటే ప్రమాదం సంభవించి ఉండేది కాదని . సంఘటన సమయంలో వాహనంలోని ఒక వ్యక్తి కిందికి దిగే సమయంలో ఒక కాలు భూమి మీద మరో కాలు వాహనంపై ఉండడంతో విద్యుత్తు ప్రసరించి ప్రమాదం సంభవించినట్లు ఒక అంచనాకు వచ్చినట్లు పేర్కొన్నారు. ఈ సంఘటనపై విచారణ చేస్తున్నామన్నారు. పోలీసులు కూడా ఈ సంఘటనకు సంబంధించి విచారిస్తున్నట్లు పోలీసు వర్గాలు పేర్కొన్నాయి. రెండు మృతదేహాలను పోస్టుమార్టం నిమిత్తం నంద్యాల ప్రభుత్వ వైద్యశాలకు తరలించారు.
About Author
