దెందులూరులో ముఖ్యమంత్రి చంద్రబాబు ఏప్రిల్ 25న పర్యటన
1 min read
సర్వం సిద్ధం చేస్తున్న అధికార యంత్రాంగం
25న సీఎం చంద్రబాబు రాకఏర్పాట్లను పరిశీలించిన ఎమ్మెల్యే చింతమనేని,కలెక్టర్,ఎస్ పి,
ఏలూరుజిల్లా ప్రతినిధి,న్యూస్ నేడు: ముఖ్యమంత్రి నారా చంద్రబాబు నాయుడు ఈ నెల 25వ తేదీన దెందులూరు నియోజకవర్గంలో పర్యటించనున్నారు. సీఎం పర్యటన ఖరారు కావడంతో అధికార యంత్రాంగం ఏర్పాట్లలో నిమగ్నమైంది. బుధవారం సాయంత్రం దెందులూరు ఎమ్మెల్యే చింతమనేని ప్రభాకర్, జిల్లా కలెక్టర్ వెట్రి సెల్వి, జిల్లా ఎస్పీ కొమ్మి ప్రతాప్ శివకిషోర్ కలిసి దెందులూరు మరియు పెదవేగి మండలాల్లో సుడిగాలి పర్యటన చేశారు.
అనువైన స్థలాల పరిశీలన
ముఖ్యమంత్రి రాక కోసం హెలిపాడ్ ఏర్పాటు, బహిరంగ సభా ప్రాంగణం మరియు వివిధ కార్యక్రమాల వేదికల కోసం అధికారులు ప్రాథమికంగా స్థలాలను పరిశీలించారు. దెందులూరు మండలం గోపన్నపాలెంలోని ప్రభుత్వ వ్యాయామ కళాశాల మైదానం, జిల్లా పరిషత్ ఉన్నత పాఠశాల మైదానంతో పాటు, పెదవేగి మండలం లక్ష్మీపురంలోని మార్కెట్ యార్డ్ ప్రాంగణాలను వారు సందర్శించారు. భద్రతా పరంగా, సౌకర్యాల పరంగా ఏ స్థలం అనుకూలంగా ఉంటుందనే అంశంపై అధికారులకు ఎమ్మెల్యే మరియు కలెక్టర్ పలు సూచనలు చేశారు.
భద్రతా ఏర్పాట్లు
సీఎం పర్యటన నేపథ్యంలో ఇంటెలిజెన్స్ సెక్యూరిటీ బృందాలకు మరియు సమన్వయ బృందాలకు పంపడం కోసం ప్రాథమిక నివేదికలను అధికారులు సిద్ధం చేశారు. ఎస్పీ కొమ్మి ప్రతాప్ శివకిషోర్ పర్యటన సాగే మార్గాలను, భద్రతా పరమైన అంశాలను నిశితంగా పరిశీలించారు.
ఈ కార్యక్రమంలో కూటమి నాయకులు, వివిధ శాఖల జిల్లా స్థాయి ఉన్నతాధికారులు, మండల స్థాయి అధికారులు మరియు సచివాలయ సిబ్బంది పాల్గొన్నారు. ముఖ్యమంత్రి పర్యటనను అత్యంత ప్రతిష్టాత్మకంగా తీసుకుని విజయవంతం చేయాలని ఈ సందర్భంగా ఎమ్మెల్యే చింతమనేని ప్రభాకర్ కార్యకర్తలకు,అధికారులకు పిలుపునిచ్చారు.
About Author
