ఐదేళ్లలో హోళగుంద మండల అభివృద్ధికి బాటలు
1 min read
ప్రజల అవసరాలకు అనుగుణంగా పలు అభివృద్ధి కార్యక్రమాలు చేపట్టాం
అధికారులు, ప్రజాప్రతినిధుల సమన్వయంతో అభివృద్ధి పనులు
హోళగుంద న్యూస్ నేడు: హోళగుంద మండల అభివృద్ధికి ఐదేళ్ల కాలంలో అన్ని వర్గాల సహకారంతో అనేక అభివృద్ధి కార్యక్రమాలు చేపట్టామని మాజీ ఎంపీపీ నూర్జహాన్, జిల్లా పరిషత్ వైస్చైర్మన్ కురువ బుజ్జమ్మ తెలిపారు. ప్రజల అవసరాలను గుర్తించి గ్రామాల్లో మౌలిక వసతుల కల్పనతో పాటు వివిధ అభివృద్ధి కార్యక్రమాలకు ప్రాధాన్యత ఇచ్చామని వారు పేర్కొన్నారు.మంగళవారం హోళగుంద మండల పరిషత్ అభివృద్ధి కార్యాలయంలో ఎంపీడీవో సయ్యద్ ఉమర్ ఆధ్వర్యంలో మండల సర్వసభ్య సమావేశం నిర్వహించారు. ఈ సమావేశానికి వివిధ ప్రభుత్వ శాఖలకు చెందిన అధికారులు, ఎంపీటీసీ సభ్యులు, ప్రజాప్రతినిధులు హాజరై మండలంలో కొనసాగుతున్న అభివృద్ధి కార్యక్రమాలు, ప్రజలకు అందుతున్న ప్రభుత్వ పథకాలు, ఆయా శాఖల పనితీరుపై చర్చించారు.సమావేశంలో వ్యవసాయ శాఖ అధికారి ఆనంద్ మాట్లాడుతూ రైతులందరూ తప్పనిసరిగా ఈ-కేవైసీ ప్రక్రియను పూర్తి చేసుకోవాలని సూచించారు. ప్రభుత్వ పథకాలు, రైతులకు అందుతున్న వివిధ రాయితీలు, ప్రయోజనాలు పొందేందుకు అవసరమైన ప్రక్రియలను రైతులు పూర్తి చేయాలని కోరారు. రైతులకు సంబంధించి వ్యవసాయ శాఖ ద్వారా అమలు చేస్తున్న కార్యక్రమాలపై సభ్యులకు వివరించారు.అనంతరం వివిధ శాఖల అధికారులు తమ తమ శాఖల పరిధిలో అమలు చేస్తున్న ప్రభుత్వ కార్యక్రమాలు, సంక్షేమ పథకాలు, అభివృద్ధి పనుల వివరాలను మండల సర్వసభ్య సమావేశంలో సభ్యులకు వివరించారు. గ్రామాల్లో ప్రజలకు ఎదురవుతున్న సమస్యలు, వాటి పరిష్కారానికి తీసుకుంటున్న చర్యలపై కూడా చర్చించారు. ప్రజాప్రతినిధులు తమ గ్రామాలకు సంబంధించిన సమస్యలను అధికారుల దృష్టికి తీసుకెళ్లారు.ఈ సందర్భంగా మాజీ ఎంపీపీ నూర్జహాన్ తనయుడు ఈసా మాట్లాడుతూ మాజీ మంత్రి, గుంతకల్లు ఎమ్మెల్యే గుమ్మనూరు జయరాం సహకారంతో పాటు అధికారులు, ఎంపీటీసీ సభ్యులు, సర్పంచులు, ఇతర ప్రజాప్రతినిధుల సమన్వయంతో హోళగుంద మండల అభివృద్ధికి కృషి చేశామని తెలిపారు. ఐదేళ్ల కాలంలో ప్రజల అవసరాలకు అనుగుణంగా వివిధ అభివృద్ధి కార్యక్రమాలను ముందుకు తీసుకెళ్లేందుకు కృషి చేశామని చెప్పారు.మండలంలోని గ్రామాల్లో ప్రజలకు అవసరమైన మౌలిక వసతులు, అభివృద్ధి కార్యక్రమాల కోసం ప్రజాప్రతినిధులు, అధికారులు కలిసి పనిచేశారని తెలిపారు. అభివృద్ధి కార్యక్రమాలను అమలు చేయడంలో అధికారులు అందించిన సహకారం, ప్రజాప్రతినిధుల సమన్వయం ఎంతో ఉపయోగపడిందన్నారు. ఐదేళ్లుగా తమకు అండగా నిలిచిన గ్రామ ప్రజలకు, ప్రజాప్రతినిధులకు, అధికారులకు, సిబ్బందికి ఆయన ప్రత్యేకంగా కృతజ్ఞతలు తెలిపారు.మండల అభివృద్ధిలో భాగస్వాములైన ఎంపీటీసీ సభ్యులు, అధికారులు, సిబ్బందిని ఈ సందర్భంగా ఘనంగా సన్మానించారు. శాలువాలు కప్పి, పూలమాలలు వేసి అభినందనలు తెలిపారు. ఐదేళ్ల కాలంలో మండల అభివృద్ధి కోసం అందించిన సేవలను గుర్తుచేసుకుంటూ పరస్పరం అభినందనలు తెలియజేశారు.ఈ కార్యక్రమంలో వైఎస్సార్సీపీ జిల్లా ఉపాధ్యక్షుడు ఎస్కే గిరి, వైస్ఎంపీపీ భర్త అనుమప్ప, జిల్లా పరిషత్ వైస్చైర్మన్ బావ శేషప్ప, వైస్ఎంపీపీ తనయుడు కెంచప్ప, ఇంగుళదహాల్ మల్లికార్జున, ఎస్డీపీఐ నాయకులు సుభాన్, అమీద్, వైఎస్సార్సీపీ నాయకులు గాదిలింగ, మరి స్వామి, వివిధ శాఖల అధికారులు, ఎంపీటీసీ సభ్యులు, సిబ్బంది తదితరులు పాల్గొన్నారు.
About Author
