హొళగుందలో రెండో రోజు వర్షం కోసం ప్రత్యేక ప్రార్థనలు
1 min read
హొళగుందలో రెండో రోజు ప్రార్థనలు
వర్షాలు కురవాలి.. పంటలు పండాలి.. రైతులు సుభిక్షంగా ఉండాలి
‘సలాతుల్ ఇస్తిస్కా’ నిర్వహించి అల్లాహ్‌ను వేడుకున్న ముస్లిం సోదరులు
హొళగుంద న్యూస్ నేడు: హొళగుంద మండలంలో వర్షాభావ పరిస్థితులు నెలకొని పంటలు ఎండిపోతున్న నేపథ్యంలో వర్షాలు కురవాలని కోరుతూ ముస్లిం సోదరులు వరుసగా రెండో రోజు ప్రత్యేక ప్రార్థనలు నిర్వహించారు. ఆదివారం స్థానిక ఈద్గా మైదానంలో ‘సలాతుల్ ఇస్తిస్కా’ (వర్షం కోసం నిర్వహించే ప్రత్యేక నమాజ్)ను భక్తిశ్రద్ధలతో నిర్వహించి అల్లాహ్‌ను ప్రార్థించారు.వర్షాలు సమృద్ధిగా కురిసి భూములు పచ్చదనంతో కళకళలాడాలని, పంటలు చేతికందాలని, రైతులు ఆర్థికంగా అభివృద్ధి చెందాలని, ప్రజలు సుఖసంతోషాలతో జీవించాలని ప్రార్థనలు చేశారు. పశుపక్ష్యాదులకు కూడా నీరు, మేత కొరత లేకుండా చూడాలని అల్లాహ్‌ను వేడుకున్నారు.ఈ సందర్భంగా మౌలానా జుబేర్ జామాయి మాట్లాడుతూ.. వర్షం కోసం ప్రార్థించడం అనేది కేవలం వర్షాన్ని కోరుకోవడం మాత్రమే కాదని, మనిషి తన తప్పులను గుర్తించి అల్లాహ్‌ను క్షమాపణ కోరుతూ సన్మార్గంలో నడవాలని సూచించారు. ప్రతి ఒక్కరూ తమలోని చెడు ఆలోచనలు, చెడు అలవాట్లను విడిచిపెట్టి మంచితనం, దయ, సోదరభావంతో జీవించాలని పిలుపునిచ్చారు.ప్రజలు ఒకరినొకరు గౌరవించుకుంటూ, పేదలు, నిరుపేదలు, అవసరంలో ఉన్నవారికి సహాయం చేయాలని మౌలానా జుబేర్ జామాయి సూచించారు. ప్రకృతి ప్రసాదించే నీరు, పంటలు, పశువులు, జీవజాలం అన్నీ మానవ జీవనానికి ఎంతో ముఖ్యమైనవని, వాటిని కాపాడుకోవాల్సిన బాధ్యత ప్రతి ఒక్కరిపై ఉందన్నారు.రైతులు వర్షాల కోసం ఎదురు చూస్తున్నారని, వర్షాభావంతో పంటలు దెబ్బతినే పరిస్థితి ఏర్పడిందని పేర్కొంటూ.. అల్లాహ్ కరుణతో త్వరలో సమృద్ధిగా వర్షాలు కురిసి రైతుల కష్టాలు తొలగాలని ఆకాంక్షించారు. ప్రజలందరూ ఐక్యంగా ఉండి కష్టకాలంలో ఒకరికొకరు అండగా నిలవాలని కోరారు.అనంతరం ముస్లిం సోదరులు ప్రత్యేక ప్రార్థనలు నిర్వహిస్తూ “వర్షాలు కురవాలి.. పంటలు పండాలి.. రైతులు, ప్రజలు సుభిక్షంగా ఉండాలి” అంటూ అల్లాహ్‌ను వేడుకున్నారు. వర్షాలు కురిసి గ్రామంలో నెలకొన్న నీటి సమస్యలు తొలగి, పాడిపంటలు సమృద్ధిగా పండాలని ప్రార్థించారు.వర్షాభావ పరిస్థితుల్లో వరుసగా రెండో రోజు నిర్వహించిన ఈ ప్రత్యేక ప్రార్థనల్లో ముస్లిం సోదరులు పెద్ద సంఖ్యలో పాల్గొన్నారు.
About Author
