ఎస్ఐఆర్ సర్వేను పారదర్శకంగా, నిష్పక్షపాతంగా నిర్వహించాలి
1 min read
హోళగుంద న్యూస్ నేడు: బీఎల్వోలకు అధికారుల ఆదేశాలు నిర్వహించిన ఎస్ఐఆర్ (ప్రత్యేక ఓటర్ల జాబితా సవరణ) సర్వే సమీక్ష సమావేశంలో బూత్ స్థాయి అధికారులు (బీఎల్వోలు) పాల్గొన్నారు. ఈ సందర్భంగా సర్వే నిర్వహణలో పాటించాల్సిన విధి విధానాలపై అధికార యంత్రాంగం బీఎల్వోలకు సమగ్రంగా అవగాహన కల్పించింది.సమావేశంలో మాట్లాడుతూ, ఓటరు జాబితా ప్రజాస్వామ్యానికి పునాది అని, అందువల్ల ఎట్టి పరిస్థితుల్లోనూ అర్హులైన ఒక్క ఓటరు కూడా జాబితా నుండి తొలగిపోకుండా అత్యంత జాగ్రత్తతో పనిచేయాలని సూచించారు. ఇంటింటి సర్వే నిర్వహించే సమయంలో ప్రతి కుటుంబాన్ని కలుసుకుని, ఓటర్ల వివరాలను క్షుణ్ణంగా పరిశీలించి, ఎన్నికల సంఘం నిర్దేశించిన మార్గదర్శకాల ప్రకారం వివరాలను నమోదు చేయాలని ఆదేశించారు.అలాగే ఎస్ఐఆర్ సర్వే ప్రక్రియలో రాజకీయ పార్టీల ప్రతినిధులను కూడా భాగస్వామ్యం చేసుకుని పారదర్శకతకు ప్రాధాన్యత ఇవ్వాలని తెలిపారు. ఎన్నికల సంఘం నిర్దేశించిన నియమ నిబంధనలను కచ్చితంగా పాటిస్తూ, నిర్ణయించిన గడువులోపు సర్వేను పూర్తి చేయాలని సూచించారు.ఈ సందర్భంగా కొత్త ఓటర్ల నమోదుకు ప్రత్యేక శ్రద్ధ చూపాలని, 18 సంవత్సరాలు నిండిన ప్రతి అర్హ యువతీ యువకుడు ఓటరుగా నమోదు అయ్యేలా చర్యలు తీసుకోవాలని బీఎల్వోలకు సూచించారు. అదే విధంగా ఓటర్ల జాబితాలో ఉన్న పేర్లు, చిరునామాలు, వయస్సు, లింగం తదితర వివరాల్లో ఉన్న తప్పొప్పులను సరిచేసే ప్రక్రియను వేగవంతం చేయాలని తెలిపారు.మరణించిన వ్యక్తుల పేర్లను సంబంధిత ఆధారాలతో తొలగించడం, శాశ్వతంగా ఇతర ప్రాంతాలకు లేదా రాష్ట్రాలకు వలస వెళ్లిన వారి వివరాలను పరిశీలించి జాబితా నుండి తొలగించడం వంటి అంశాలపై ప్రత్యేక దృష్టి సారించాలని సూచించారు. ఒకే వ్యక్తి పేరు రెండు చోట్ల నమోదై ఉంటే వాటిని గుర్తించి తగిన చర్యలు తీసుకోవాలని తెలిపారు.ఓటర్ల జాబితా పూర్తిగా ఖచ్చితంగా, పారదర్శకంగా ఉండేలా ప్రతి బీఎల్వో బాధ్యతాయుతంగా వ్యవహరించాలని, ప్రజలతో సత్సంబంధాలు కొనసాగిస్తూ వారి సందేహాలను నివృత్తి చేయాలని సమావేశంలో పేర్కొన్నారు. ఎన్నికల సంఘం నిర్దేశించిన లక్ష్యాలను విజయవంతంగా పూర్తి చేసి ప్రజాస్వామ్య పరిరక్షణలో తమ వంతు పాత్ర పోషించాలని బీఎల్వోలకు సూచించారు.ఈ సమావేశంలో సంబంధిత అధికారులు, బూత్ స్థాయి అధికారులు (బీఎల్వోలు), సిబ్బంది తదితరులు పాల్గొన్నారు. ప్రజాస్వామ్య వ్యవస్థ బలోపేతానికి ఖచ్చితమైన ఓటర్ల జాబితా ఎంతో అవసరమని, అందుకోసం ప్రతి ఒక్కరూ సమన్వయంతో పనిచేయాలని సమావేశంలో పిలుపునిచ్చారు.
About Author
