మహిళా పారిశ్రామికవేత్తలను ప్రోత్సహిస్తున్నాం.. రాష్ట్ర మంత్రి టి.జి భరత్
1 min read
కర్నూలు, న్యూస్ నేడు: రాష్ట్రంలో ప్రత్యేక మహిళా పారిశ్రామిక పార్కు ఏర్పాటుకు ఏపీఈడీబీ( APEDB) మరియు ఫిక్కీ ఫ్లో (FICCI – FLO) మధ్య అవగాహన ఒప్పందం రాష్ట్రంలో పెట్టుబడులు పెట్టే పారిశ్రామికవేత్తలకు అన్నివిధాలా సహకారం అందిస్తున్నామని రాష్ట్ర పరిశ్రమలు, వాణిజ్యం, ఫుడ్ ప్రాసెసింగ్ శాఖ మంత్రి టి.జి భరత్ చెప్పారు. మంగళగిరిలోని ఏపీఐఐసీ కార్యాలయంలో మంత్రి టి.జి భరత్ సమక్షంలో ఆంధ్రప్రదేశ్ ఆర్థిక అభివృద్ధి బోర్డు (APEDB), ఫెడరేషన్ ఆఫ్ ఇండియన్ ఛాంబర్స్ ఆఫ్ కామర్స్ అండ్ ఇండస్ట్రీ లేడీస్ ఆర్గనైజేషన్ (FICCI – FLO) మధ్య ఒక అవగాహన ఒప్పందం కుదిరింది. ఏపీ ఇండస్ట్రియల్ ఇన్ఫ్రాస్ట్రక్చర్ కార్పొరేషన్ వైస్ చైర్మన్ మరియు మేనేజింగ్ డైరెక్టర్ ఎం. అభిషిక్త్ కిషోర్ సమక్షంలో ఫిక్కీ ఫ్లో (FICCI – FLO) జాతీయ అధ్యక్షురాలు పూనమ్ శర్మ, జాతీయ పాలక మండలి సభ్యురాలు ఉజ్వల సింఘానియా, జాతీయ పాలక మండలి సభ్యురాలు మౌర్య బోడా ఫిక్కీ ఫ్లో విజయవాడ చాప్టర్ చైర్పర్సన్ అమృత కుమార్, విజయవాడ చాప్టర్ సీనియర్ వైస్ చైర్పర్సన్ సుప్రియ మల్లినేని ఈ అవగాహన ఒప్పందంపై సంతకం చేశారు.ఈ సందర్బంగా మంత్రి టి.జి భరత్ మాట్లాడుతూ రాష్ట్రంలో పెట్టుబడులు పెట్టేందుకు పారిశ్రామికవేత్తలు ఎంతగానో ఆసక్తి చూపుతున్నారన్నారు. ప్రధానంగా మహిళా పారిశ్రామికవేత్తలను ప్రోత్సహించేందుకు తమ ప్రభుత్వం ఎంతో కృషి చేస్తోందని తెలిపారు. పారిశ్రామికవేత్తలకు అనుకూలమైన వాతావరణం రాష్ట్రంలో కల్పిస్తున్నామన్నారు. ఈ అవగాహన ఒప్పందం ఆంధ్రప్రదేశ్ పాలసీ ఫర్ ఎస్టాబ్లిష్మెంట్ ఆఫ్ ప్రైవేట్ ఇండస్ట్రియల్ పార్కులు విత్ ‘ప్లగ్ అండ్ ప్లే’ ఇండస్ట్రియల్ ఇన్ఫ్రాస్ట్రక్చర్ (4.0), 2024-29 కింద 30 ఎకరాల విస్తీర్ణంలో ప్రత్యేక మహిళా వ్యవస్థాపకుల పారిశ్రామిక పార్కును ఏర్పాటు చేయడానికి దోహదపడుతుంది. ప్రతిపాదిత పారిశ్రామిక పార్కును ఫిక్కీ ఫ్లో ( FICCI – FLO) సభ్యులుగా ఉన్న మహిళా వ్యవస్థాపకుల కోసం ప్రత్యేకంగా అభివృద్ధి చేస్తారు. తద్వారా మహిళలకు ఉద్యోగ, ఉపాధి అవకాశాలు లభించడంతో పాటు ఆర్థికంగా బలపడేందుకు అవకాశం ఉంటుంది.ముఖ్యమంత్రి నారా చంద్రబాబు నాయుడి “ఒక కుటుంబం, ఒక వ్యవస్థాపకుడు” అనే పిలుపుతో వీరు ముందుకొచ్చారు. ఆంధ్రప్రదేశ్ ప్రభుత్వ నిబంధనలకు అనుగుణంగా ఆంధ్రప్రదేశ్ పారిశ్రామిక మౌలిక సదుపాయాల సంస్థ అవసరమైన అన్ని చట్టబద్ధమైన ఆమోదాలు, మౌలిక సదుపాయాల కల్పన మరియు విధాన స్థాయి మద్దతును సులభతరం చేస్తుంది. అన్ని భూ కేటాయింపులు, ప్రోత్సాహకాలు మరియు చట్టబద్ధమైన ప్రయోజనాలను సంబంధిత విభాగాలు ప్రస్తుత ప్రభుత్వ విధానాల ప్రకారం తగిన ప్రక్రియ ద్వారా ప్రాసెస్ చేస్తాయి. ప్రతి అసెంబ్లీ నియోజకవర్గంలో ఒకటి చొప్పున 175 ఎంఎస్ఎంఈ పార్కులను అభివృద్ధి చేయాలనే రాష్ట్ర ప్రభుత్వ ప్రతిష్టాత్మక ప్రణాళికకు ప్రతిపాదిత మహిళా వ్యవస్థాపకుల పారిశ్రామిక ఉద్యానవనం పూర్తి చేస్తుంది.
About Author
